Erion Veliaj miraton nga IEVP Durrës dorëheqjet në Bashkinë e Tiranës dhe fondet për çerdhet e pensionistët

Kryetari i Bashkisë së Tiranës, Erion Veliaj, ka marrë sot vendimmarrjet e tij të para administrative nga ambientet e IEVP Durrës, ku ndodhet në masën e paraburgimit prej 19 muajsh.

Sipas një njoftimi zyrtar të shpërndarë nga Bashkia e Tiranës, kryebashkiaku ka miratuar lirimin nga detyra të tre drejtuesve kryesorë të kabinetit të tij, duke pranuar dorëheqjet e zëvendëskryetares Anuela Ristani, Sekretarit të Përgjithshëm Eldi Hoxha, si dhe shefes së Kabinetit, Blerina Beshku.

Paralelisht me lëvizjet administrative në stafin drejtues, Veliaj ka kryer edhe zhbllokimin e financave të institucionit. Nga njoftimi bëhet e ditur se të gjitha listëpagesat e Bashkisë së Tiranës janë firmosur prej tij brenda një ore nga momenti i mbërritjes së dokumentacionit në paraburgimin e Durrësit. Po nga qelia, kryebashkiaku ka miratuar disa vendime me efekt financiar për kryeqytetin.

Çerdhet dhe kopshtet

Është miratuar një shtesë fondesh e dedikuar për garantimin e financimit dhe mbarëvajtjen e punës në institucionet arsimore parashkollore.

Transporti publik

Është miratuar alokimi i fondeve që siguron vijueshmërinë e skemës së aboneve falas për të gjithë pensionistët e Tiranës.

/rtsh.al/