FIFA e UEFA: Neni 53 dhe Ligji i Sportit, pikat e nxehta të futbollit

Vizita 24-orëshe e FIFA-s dhe UEFA-s në Shqipëri pas heqjes së pezullimit nuk i ka dhënë zgjidhje pikave të nxehta që karakterizuan përplasjen FSHF-MTKRS. Ky ka qenë edhe konfirmimi i grupit të ndërkombëtarëve, i përbërë nga shefi i marrëdhënieve ndërkombëtare të FIFA-s, Zherom Shampanj, shefi i zyrës ligjore të UEFA-s, Marcel Benz dhe delegatja e FIFA-s, Eva Paskuer. Pas takimit që kanë zhvilluar gjatë paradites në ambientet e FSHF-së, ata janë takuar edhe me ministrin e Sporteve, Ylli Pango, dhe zv/ministrin e Ekonomisë, Florian Mima. Pasi kanë folur me dy përfaqësuesit e shtetit, të dërguarit e FIFA-s dhe UEFA-s kanë nxjerrë konkluzionin se duhet ende punë për nenin 53 të statutit të federatës, ndërkohë që qeveria pretendon 10 për qind të të ardhurave. Synimi është mbrojtja e interesave të futbollit. "Biseduam me përfaqësuesit e Ministrisë së Sporteve dhe të Ekonomisë, por ende nuk kemi arritur një pikë të përbashkët rreth nenit 53. Kemi rezerva edhe për Ligjin e Sporteve. Aty ekzistojnë nene që nuk mund t‘i pranojmë, pasi paratë e futbollit duhet të jenë pronë e njerëzve të këtij sporti dhe ato nuk duhet të shpërndahen tek ata që janë jashtë tij. Gjithsesi, mendojmë se jemi në rrugë pozitive", pohuan ndërkombëtarët.