FOKUS – Autoriteti shëndetësor i Gazës raporton vdekje të tjera pas sulmeve izraelite

TEL AVIV, 17 korrik /ATSH-DPA/- Pesë persona janë vrarë në sulmet izraelite në Rafah në jug të Rripit të Gazës dhe në Nuseirat dhe në një kamp refugjatësh në qendër, njoftoi sot agjencia palestineze e lajmeve WAFA.

Forcat e Mbrojtjes të Izraelit (IDF) thanë se po vazhdonin operacionet në këto zona. “Individët që sulmonin me raketa kundër trupave të IDF-së në Rafah ishin shënjestruar”, tha IDF.

Forcat Ajrore izraelite goditën dje objektivat në qytet – nga ku ishin hedhur raketa në Izrael. “Terroristët ishin vrarë gjithashtu në qendër të Rripit të Gazës”, thuhet në raport.

Trupat e IDF-së kishin vrarë një snajper të Hamasit dhe një anëtar tjetër të organizatës militante palestineze në veri të rajonit.

Sipas raportit, më shumë se 25 objektiva u goditën dje nga ajri në të gjithë Rripin e Gazës.

Autoriteti shëndetësor i kontrolluar nga Hamasi raportoi se të paktën 81 palestinezë janë vrarë në Rripin e Gazës gjatë 24 orëve të fundit.

“Të paktën 38 794 njerëz kanë vdekur dhe 89 364 të tjerë janë plagosur që nga fillimi i luftës”, sipas autoritetit.

Shifrat nuk dallojnë civilët dhe luftëtarët dhe nuk mund të verifikohen në mënyrë të pavarur. //a.i/