FOKUS – BM: Një bazë ajrore në Volgograd pësoi dëme të rënda

LONDER,, 9 shtator /ATSH-DPA/ – Një bazë ajrore në rajonin e Volgogradit të Rusisë ka pësuar dëme të rënda në një sulm ukrainas, njoftoi sot shërbimi sekret britanik.

Katër hangarë u shkatërruan dhe tre të tjerë u dëmtuan në sulmin në bazën ajrore Marinovka më 22 gusht, sipas raportit ditor të inteligjencës të Ministrisë së Mbrojtjes të Londrës mbi X.

Imazhet satelitore të publikuara nga britanikët treguan shkatërrimin para dhe pas sulmit.

Guvernatori rajonal rus Andrey Botsharov minimizoi dëmet e shkaktuara nga sulmi me dron ukrainas në atë kohë. Ai kishte pohuar se zjarri kishte filluar për shkak të një përplasjeje droni.

Baza ajrore Marinovka ndodhet afërsisht 45 kilometra në perëndim të kryeqytetit rajonal Volgograd. Në vendngjarje janë stacionuar avionët luftarakë rusë Su-24.

Ministria britanike e Mbrojtjes ka publikuar informacione të përditshme për ecurinë e luftës që nga pushtimi rus i Ukrainës në shkurt të vitit 2022. Moska akuzon Londrën për përhapjen e dezinformatave.   /os/