FOKUS – Sierra Leone zyrtarisht ndalon martesën e fëmijëve

TIRANË, 3 korrik /ATSH/- Sierra Leone ka paraqitur zyrtarisht ligjin e ri që ndalon martesat e fëmijëve – në një ceremoni të organizuar nga Zonja e Parë Fatima Bio në kryeqytetin, Freetown, sipas BBC.

Bashkeshorti i saj, presidenti Julius Maada Bio nënshkroi ligjin e Aktit të Ndalimit të Martesave të Fëmijëve.

Kushdo që përfshihet në martesën e një vajze nën moshën 18 vjeç do të burgoset për të paktën 15 vjet ose do të gjobitet me rreth 4000 dollarë – ose të dyja.

Sierra Leone është një shoqëri patriarkale dhe është e zakonshme që një baba të japë dorën e vajzës së tij për martesë me forcë.

Ministria e Shëndetësisë vlerëson se një e treta e vajzave martohen para se të mbushin 18 vjeç, gjë që përbën numrin e lartë të vdekjeve të nënave në vend – ndër më të lartat në botë.

Ata që përballen me ndëshkimin sipas rregullave të reja përfshijnë dhëndrin, prindërit ose kujdestarët e nuses fëmijë, madje edhe ata që marrin pjesë në dasmë.

Në ceremoni, presidenti Bio tha se motivimi dhe angazhimi i tij për fuqizimin e grave dhe vajzave është i rrënjosur fort në rrugëtimin e jetës së tij personale.

Vajza e tij 8-vjeçare ishte mes pjesëmarrësve që e panë atë të nënshkruante projektligjin.

Presidenti 60-vjeçar theksoi angazhimin e bashkëshortes së tij për të mbrojtur të drejtat e grave.

“Së bashku, ne duam të ndërtojmë një Sierra Leone të fuqizuar – ku grave u jepet një platformë e barabartë për të arritur potencialin e tyre të plotë. Gjithmonë kam besuar se e ardhmja e Sierra Leone-s është gruaja”, tha ai.

Aktivistët e të drejtave reaguan pozitivisht ndaj ligjit, duke e quajtur atë një moment vendimtar.

Byroja e Çështjeve Afrikane e SHBA-së përshëndeti miratimin e projektligjit duke thënë se ai jo vetëm që mbron vajzat, por promovon mbrojtje të fuqishme të të drejtave të njeriut.//a.i/