FOTOT- Një ditë nga jeta e vështirë e një familjeje në kërkim të ushqimit në Gaza
E zhvendosur disa herë gjatë konfliktit të vazhdueshëm midis Izraelit dhe Hamasit, familja Sobh prej tetë anëtarësh sot jeton në një tendë të improvizuar në një kamp refugjatësh në perëndim të qytetit të Gazës. Përditshmëria e tyre është një luftë e vazhdueshme për të gjetur ushqim dhe ujë.
Fotot e realizuara nga Jehad Alshrafi i AP-së, tregojnë qartë vështirësitë me të cilat përballet familja. Në një nga imazhet, Fadi Sobh shfaqet duke u dhënë supë me thjerrëza fëmijëve të tij, ndërsa ata ulen në dyshemenë e tendës. Kjo supë, e gatuar me vështirësi, është shpesh e vetmja shpresë për t’u ushqyer.
Nëpërmjet imazheve pasqyrohet dhe vështirësia e Abeer Sobh, e cila detyrohet të lajë rrobat brenda hapësirës së ngushtë të tendës. Një tjetër foto prekëse tregon Abeerin duke i dhënë ujë me shishe foshnjës së saj, një dëshmi e mungesës së kushteve minimale higjienike. Madje, në një nga imazhet shfaqet djali i saj 9-vjeçar, Mohammad, duke u freskuar brenda tendës, në një përpjekje për të përballuar vapën.
Vështirësitë e jetës në kamp theksohen më tej nga Malak Sobh, vajza 7-vjeçare, e cila kërkon nëpër mbeturina për të gjetur plastikë për ta përdorur si lëndë djegëse për gatim, pasi mungesa e burimeve është akute.
Rrëfimi vizual i familjes Sobh është një dëshmi e gjallë e pasojave çnjerëzore të luftës, ku civilët janë ata që paguajnë çmimin më të lartë. Pavarësisht vështirësive, prindërit përpiqen të sigurojnë pak ushqim dhe një strehë të përkohshme për fëmijët e tyre, duke dëshmuar përpjekjet e tyre të palodhura për mbijetesë.
/rtsh.al/