FSHF dhe UEFA organizojnë Festivalin e Futbollit për fëmijë, Ceferin: Futbolli bashkon njerëzit

TIRANË, 11 shtator /ATSH/ Në “Shtëpinë e Futbollit” u zhvillua sot festivali i futbollit si pjesë e aktivitetit “Futbolli në Shkolla” të UEFA-s, me pjesëmarrjen e veçantë të Presidentit të UEFA-s, Aleksander Čeferin, Presidentit të Federatës Shqiptare të Futbollit, Armand Duka, dhe të gjithë anëtarëve të Komitetit Ekzekutiv të UEFA-s.

Gjithashtu, në ceremoninë hapëse morën pjesë edhe ambasadorët e UEFA-s Luís Figo dhe Aljoša Asanović, ambasadori i FSHF-së për këtë event Jahmir Hyka, ish-lojtarë dhe personalitete vendase, djem dhe vajza nga shkollat lokale dhe prindër, duke krijuar një atmosferë festive në “Shtëpinë e Futbollit”.

Pas mbërritjes së delegacionit, fëmijët krijuan një korridor mikpritjeje për Presidentin Čeferin dhe Presidentin Duka.

Aktiviteti vijoi me një ndeshje futbolli, ku pjesë e ekipeve ishin Presidenti Čeferin, Luís Figo, Aljoša Asanović, trajneri i Kombëtares shqiptare Silvinjo, dy zëvendës-trajnerët Zabaleta dhe Doriva, Jahmir Hyka dhe fëmijët nga shkollat lokale, duke përcjellë mesazhin se futbolli, sporti më i dashur në botë, është për të gjithë.

Pas përfundimit të ndeshjes, Presidenti i UEFA-s Aleksander Čeferin dhe Presidenti i FSHF-së, Armand Duka folën për mediat shqiptare që mbuluan këtë aktivitet shumë të rëndësishëm në prag të mbledhjes historike të Komitetit Ekzekutiv të UEFA-s në Tiranë.

Në fjalën e tij përpara mediave shqiptare, Presidenti i UEFA-s nënvizoi se futbolli duhet t’i bashkojë njerëzit dhe jo t’i përçajë.

Ai theksoi se duhet të qëndrojnë larg futbollit njerëzit që e përdorin këtë lojë për të përhapur idetë e tyre të kota.

“Mesazhi im, jo vetëm për një ndeshje të caktuar, por për të gjithë është se futbolli dhe sporti duhet të jenë gjëja që bashkon njerëzit dhe jo që i përçan. Ne duhet të përpiqemi të largojmë këta ‘idiotë’ që e përdorin futbollin për ideologjitë e tyre absurde. Kudo, jo vetëm në një vend, por në të gjitha vendet. Sepse këta njerëz nuk e duan futbollin. Ata duan vetëm veten e tyre dhe e shfrytëzojnë futbollin për të përhapur idetë e tyre të kota”.

I pyetur se pse pritën kaq gjatë për të zhvilluar mbledhjen e Komitetit Ekzekutiv të UEFA-s në Tiranë, kreu i qeverisë së futbollit evropian tha se, “se kjo është mbledhja e tretë ose e katërt që bëjmë jashtë Zvicrës. Çdo shtator ne shkojmë në vende të ndryshme. Mendoj se keni një medalje bronzi tani dhe kjo është diçka shumë e mirë”.

Presidenti Ceferin vlerësoi infrastrukturën e futbollit në Shqipëri, veçanërisht stadiumin kombëtar.

Sa i përket projekteve që UEFA ka për Shqipërinë, ai tha se duhet folur me Presidentin Duka dhe për momentin nuk mund të flasë për diçka konkrete.

“Duhet të flisni me Presidentin e FSHF-së për këtë. Por infrastruktura juaj dhe veçanërisht stadiumi kombëtar është shumë i bukur. Mund të organizojmë diçka këtu, por për momentin nuk do të ishte e drejtë nga ana ime të flisja për diçka konkrete. Nga njëra anë, ka një proces aplikimi dhe nga ana tjetër, aktualisht nuk e di. Di vetëm që keni infrastruktura është shumë e mirë dhe kam një marrëdhënie të shkëlqyer me Armandin, gjë që ndihmon shumë”, u shpreh Ceferin.

Në fund, shefi i futbollit europian dha edhe një këshillë për lojtarët e rinj në të gjithë Europën dhe nënvizoi se ata duhet të qëndrojnë sa më gjatë në kampionatet vendase. “Do t’u jepja një këshillë të gjithë lojtarëve të rinj, jo vetëm në Shqipëri. Të punojnë, të punojnë dhe të punojnë. U them të qëndrojnë sa më gjatë në kampionatet vendase sepse është më e lehtë ta provosh veten në një ligë vendase dhe më pas të shkosh jashtë. Shumë lojtarë gabojnë kur largohen në moshën 16-17 vjeçare në klube të mëdha dhe në fund karriera e tyre përfundon para kohe. Prandaj ata duhet të shijojnë futbollin dhe të stërviten sa më shumë”.

Duka e nisi prononcimin me një falënderim të veçantë për Presidentin e UEFA-s, Aleksander Čeferin.

Kreu i FSHF e cilësoi këtë moment historik si një vlerësim i punës së madhe të bërë nga komuniteti i futbollit në vend për zhvillimin e futbollit në Shqipëri.

“Do të doja të falënderoja publikisht Presidentin e UEFA-s, Aleksander Čeferin, për vendimin që mbledhja e Komitetit Ekzekutiv të bëhet në Tiranë. Ky është një vlerësim jo vetëm për Federatën e Futbollit, por për të gjithë komunitetin e futbollit shqiptar. Një vlerësim i bashkëpunimit të Federatës së Futbollit me UEFA-n dhe respekt i punës së komunitetit të futbollit shqiptar. Nuk është thjesht një mbledhje, është një event duke përfshirë edhe aktivitetin e sotëm, festivalin e futbollit ku besoj se në memorien e fëmijëve do të mbetet gjatë dhe do të jetë një objektiv më shumë për t’iu bashkuar lojës tonë”,  tha Duka.

Aktiviteti u shoqërua edhe me zhvillimin e një ndeshjeje futbolli ku morën pjesë Presidenti Čeferin, Luís Figo, Aljoša Asanović, trajneri i Kombëtares shqiptare Silvinjo, dy zëvendës-trajnerët Zabaleta dhe Doriva, Jahmir Hyka dhe fëmijët nga shkollat lokale.

Pas ndeshjes, në një prononcim për mediat, Luis Figo, ambasador i UEFA-s dhe një nga legjendat më të mëdha të futbollit europian u shpreh i lumtur për praninë e tij sot në Tiranë.

“Që nga hera e fundit që kam qenë këtu, shoh një ndryshim të madh. Jam shumë i lumtur që jam këtu. Sa herë vij, ndjej një mbështetje të madhe nga të gjithë ata që e duan futbollin”, tha ai.

Legjenda portugeze vlerësoi sportistët e rinj shqiptarë, duke i këshilluar që të gjejnë balancën mes edukimit dhe sportit në jetë.

“Janë shumë të rinj, por mendoj se, ashtu si në çdo vend tjetër, gjëja më e rëndësishme është të gjesh balancën mes edukimit dhe sportit. Nëse studion dhe i kushton kohë mësimeve, ndërkohë që luan edhe sport, veçanërisht futboll, është edhe më mirë. Mendoj se gjëja më e rëndësishme, jo vetëm në sport por edhe në jetë është pasioni për atë që bën. Nuk ka rëndësi nëse është sport apo një fushë tjetër e jetës. Duhet të punosh fort dhe të ndjekësh ëndrrat e tua. Me këto dy përbërës, besoj se është shumë më e lehtë të arrish qëllimet”, u shpreh Figo.

Ambasadori i UEFA-s, Aljoša Asanović, u shpreh i lumtur që ndodhet në Shqipëri për festivalin e futbollit për fëmijë, duke e cilësuar programin një mundësi të mrekullueshme për fëmijët dhe shkollat. Ai vlerësoi progresin e futbollit shqiptar, punën e mirë të Presidentit dhe paraqitjet pozitive të Kombëtares shqiptare në Euro 2024.

“Jam shumë i lumtur që jam këtu. Është një program i mrekullueshëm për fëmijët, për shkollat dhe për të gjithë këtu. Pas ceremonisë po qëndroj këtu dhe po shijoj kohën me fëmijët. Ne jemi këtu për fëmijët. Gjëra shumë pozitive dhe këtë e pashë në Kampionatin e fundit Europian. Në Gjermani pamë paraqitjen e mirë që bëri ekipi juaj dhe ju keni një trajner shumë të mirë, gjithashtu edhe një president të mirë. Thjesht vazhdoni kështu dhe shumë shpejt do t’i shohim ekipet shqiptare lart”, tha Aljoša Asanović.

Ambasadori i FSHF-së, Jahmir Hyka, në prononcimin e tij gjatë festivalit të futbollit për fëmijë, u shpreh i kënaqur për organizimin dhe pjesëmarrjen e madhe të fëmijëve.

Ai theksoi rëndësinë e kujdesit dhe edukimit të brezit të ri, duke theksuar se fillimisht duhet edukuar dashuria dhe respekti për sportin dhe më pas mësimi i futbollit. Hyka shprehu bindjen se këto iniciativa do të ndihmojnë në krijimin e një të ardhmeje më të mirë për fëmijët dhe futbollin shqiptar.

“Është kënaqësi gjithmonë të jesh këtu mes fëmijëve dhe të krijohen këto organizime të bukura për fëmijët. Është kënaqësi dhe m’u bë shumë qejfi që kishte kaq shumë pjesëmarrje, shpresoj të ketë edhe në të ardhmen. Është një brez që do shumë kujdes sepse kohët kanë ndryshuar pak nga brezi jonë. Jemi duke u munduar që t’i edukojmë në radhë të parë, pastaj edhe t’i mësojmë që të luajnë futboll. Shpresoj që do të kenë një të ardhme të mirë”, tha Jahmir Hyka.

FSHF dhe UEFA organizojnë Festivalin e Futbollit për fëmijë Foto: Andrin Hoxha 1 nga 31

/gj.m