FUTBOLL – FSS paralajmëron tifozët serbë para ndeshjes me Anglinë

BEOGRAD, 8 shtator /ATSH-DPA/ – Tifozët serbë janë paralajmëruar nga Federata Serbe e Futbollit (FSS) se “çdo reagim, fyerje ose incident i papërshtatshëm” në ndeshjen e së martës kundër Anglisë mund të dëmtojë shpresat e tyre për Kupën e Botës.

Skuadra e Thomas Tuchel është në Beograd për një ndeshje kyçe të Grupit K në stadiumin ”Rajko Mitiç”, ku kapaciteti është zvogëluar me 15% për shkak të sjelljes së mëparshme të tifozëve.

FIFA ndëshkoi Shoqatën e Futbollit të Serbisë (FSS), ndër të tjera, për “diskriminim dhe abuzim racist” në ndeshjen e qershorit kundër Andorrës dhe përballet me sanksione të mëtejshme nëse ka probleme kundër Anglisë.

FSS u ka bërë thirrje tifozëve të “mbështesin ekipin kombëtar në mënyrën e duhur”.

“Me respektin e duhur për kundërshtarin, besoj se do të tregojmë se kemi edhe ne njëfarë fjale në fushë, të udhëhequr nga pasioni, disiplina dhe uniteti”, tha FSS.

“Përveç spektaklit që presim në fushë, tërheqim vëmendjen për diçka po aq të rëndësishme: sjelljen e të gjithëve ne në tribuna. Kjo ndeshje e së vërtetës mbart gjithashtu përgjegjësi të madhe. Ne jemi ende nën monitorim të veçantë të UEFA-s. Çdo reagim, fyerje ose incident i papërshtatshëm mund të na kushtojë shtrenjtë në rrugën tonë drejt SHBA-së, Meksikës dhe Kanadasë, duke përfshirë mundësinë e të luajturit një ndeshje vendimtare me Shqipërinë pa praninë e tifozëve”, thekson FSS.

“Kjo është arsyeja pse ju bëjmë thirrje sinqerisht dhe seriozisht: le të brohorasim nga zemra, por le të jetë e drejtë. Mund të jemi të zhurmshëm, por dinjitozë. Le të jetë mbështetja jonë një burim force, jo një rrezik për ekipin kombëtar. Futbolli lindi në Angli, por Beogradi duhet të jetë vendi ku loja merr një emocion të ri më 9 shtator. Ky është shansi ynë për t’u bashkuar, për t’i kujtuar vetes pse e duam futbollin dhe sa shumë do të thotë kur i gjithë kombi merr frymë si një. Kjo është një ndeshje për pikë, por edhe për krenari. Le të dërgojë Beogradi një mesazh botës më 9 shtator: një mesazh për forcën, unitetin dhe dashurinë e Serbisë për futbollin”, përfundon FSS.

Në vitin 2012, UEFA urdhëroi ekipin e Serbisë nën 21 vjeç të luante një ndeshje pa praninë e tifozëve për ”sjellje të papërshtatshme të mbështetësve të saj, konkretisht sjellje raciste”, në një ndeshje play-off të Kampionatit Evropian kundër Anglisë në Krushevac./ a.jor.