Faleminderit Doktor!

Arben Rrozhani   

Doktor, faleminderit që u ktheve! Të pashë mbrëmë  kur fole për herë të parë për këtë legjislaturë, në  sallën e Kuvendit të Shqipërisë. Kishe ruajtur simbolet blu, jo vetëm kravatën dhe shaminë në thilenë  e xhaketës. ishe i tëri blu, madje një moment nga  fundi i fjalimit tënd pa fund u bëre edhe mavi. Prej  qershorit, para se të merrje “1 milion shpulla”, siç  tha mbrëmë ai që i drejtohesh Edvin Kristaq Rama, që të ka zënë poltronin në atë sallë dhe nesër  e tutje do ta zërë edhe në selinë e kryeministrisë,  nuk të kisha parë të mbushje me klithma, akuza,  etiketime, specifikime, ato “po, po”-të e tua anektodike, ato grimasat sarkastike sërish për të majtën  e sallës, që në këtë legjislaturë të ka pushtuar edhe  të djathtën tënde të ngulfatur në 50 e ca karrike  dhe desktopë ekranëfikur, që t’i bëri peshqesh Jozefina para se të linte foltoren e spikeres së Kuvendit.  Kjo është edhe më e rëndë Doktor. Atë e kishe për-ballë, kokëfshehur pas desktopit të vetëprokuruar  drejtpërdrejt dhe atje pas shpine, kishe ilir Metën,  atë cinik dhe bukëshkalë që mbrëmë të dha lejen  që të flasësh pa fund, siç kishte dhënë urdhër edhe  armiku i demokracisë Gramoz Ruçi.  Çfarë nuk fole, çfarë nuk the. E dërrmove kastën e  kuqe, me në krye komunistin 34-vjeçar dhe banditin  Saimir Tahiri. Dole dhe fole aq gjatë, edhe pse kreu i  grupit tënd Edi Paloka nuk të dha leje. Po mirë ja bëre,  se nuk ka tagrin ai të flasë para teje dhe më shumë  se ti, jo vetëm se ka atë problemin e gjuhës, por  edhe se ai është thjesht një kryetar i komanduar,  prej një kryetari partie, që ti vetë e ke komanduar  që të bëjë ndonjë mbledhje televizive te SHQUP-i.  Ja bëre si trimat. ia numërove  Edvin Kristaq Ramës gjithë mashtrimet që u ka bërë shqiptarëve  edhe pa marrë pushtetin. Të imagjinoj si ndjehesh. Ai rrëmbeu  1 milion shpulla bashkë me ilir  Metën dhe ato të çuan ty nga  froni mbretëror ku doje, atje në  radhën e dytë të anës së djathtë  sallës së Kuvendit, ku ke krah të  djathtë Jozefinën, para dhe pas ca  çupëlina dhe djem rioshë. Vetëm ti  je shpresa për ta. Askush tjetër. Foli edhe Mul Noka, edhe Mond Spaho, edhe Igli Cara. Fund e krye  përdorën fjalët e tua por s’më mbushën. Se nuk  mjaftojnë vetëm fjalët. Duhet mimika jote përplot  rrudha, grimasa jote që më kujton ca filma e Stenli  Kubrikut, gjestikulacioni yt, që më çon pas në kohë  nja 70 vite kur bëhej luftë e madhe, por duhet mbi  të gjitha aftësia jote e pamasë për të dërrmuar  kundërshtarin për ato që s’ka bërë. Do thënë se  nuk kanë nisur. Punë e madhe. Dita e mirë duket  që në mëngjes. Ku është parë në atë sallë Kuvendi,  të paktën këto 8 vitet e fundit, që kryetari t’ia lërë  drejtimin e seancës nënkryetarit të PD-së (gojët e  liga thonë se Mond Spahos ia dha-në ato 99 vota, sepse është 99-ësh, prandaj mos i beso shumë).  Ku është parë që kreu i opozitës,  ku ishe katandisur mbrëmë Dok-tor, të flasë pa limit, të shajë me  rrënjë e me degë kryeministrin dhe  çdo deputet të shumicës dhe të  mos i përgjigjet askush; ku është  parë që të akuzosh për banda,  krim, trafik dhe korrupsion dhe të  mos të të hidhet askush në grykë,  të mos zbrezë kryeministri si ti para qershorit, dhe t’i  futësh brrylin Erjon mistrecit, t’ia çosh në semafor  motrën Taulantit, t’ia lyesh me pudër-drogë fytyrën  Artës, tia nxish surratin Gramozit të zi, t’ia kujtosh  me ca fjalë të ëmbla greke, ca të pabëra Anastasit.  Ta kanë me hile Doktor. U gëzova shumë që dole  pas fjalës. Duan të të lënë në foltore, në këmbë,  apo edhe të flasësh aty nga vendi po deshe, ku ke  krah të djathtë Jozefinën. Duan që të lodhesh, të  topitesh, të të humbë filli i fjalës, të të ikë ngjyra  e fytyrës si atë 12 dhjetor 2011 te holli i Pallatit  të Kongreseve. Mos bjer viktimë Doktor. Do të ta  vonojnë ambulancën, i pari ai i gjati që është djali  i atij profesorit, që do jetë ministër shëndetësie. Ti  e di vetë, sepse u thua bijtë e etërve, me të drejtë.  Prandaj, të lutem, merre në konsideratë. Duan të  të bëjnë viktimë dhe pastaj të thonë: Nuk kemi faj  ne, respektojmë opozitën, por fajin e ka mosha. Prandaj rro gjatë në Kuvend, aty ku je. Përmendua pa  pushim 10 mijë kilometrat e rrugëve, shkollat fringo  të reja, ujësjellësat, punët që u dhe shqiptarëve, rrogat  dhe pensionet që u ngrite, ekonominë që ua bëre të  dytën pas Gjermanisë së Merkelit, plazhet plot me 4  milionë turistë, Shqipërinë dixhitale që vjen jo vetëm  në ipadin tënd, ku demaskoje mbrëmë programin fantazmë të Piktorit, Shqipërinë si superfuqi të vogël en-ergjitike në rajon. Le të plasin. Bashkë me ata 1 milion  votues, që dreqi e di pse s’i panë gjithë këto mrekulli që  ti paske bërë dhe të lanë të katandisesh në këtë derexhe. Por mos u ligështo. Qëndro! Dhe ec, drejt luftës  siç e di ti, si 15 vite më parë. Përpara!