Flamuri shqiptar acaron serbët

Incidente ne Stamboll gjate ndeshjes Beshiktash-Cervena Zvezda. Tere pallati i sportit pushtohet nga thirrjet "Kosova - Kosova". Valeviten flamujt shqiptare. Serbet: E pame pisk

TIRANË – Pati flamur shqiptar nga tifozët e Olimpikut të Marsejës, pati përshëndetje diku tjetër, por një atmosferë si ajo në pallatin e sportit “Kola Turk” të Stambollit në ndeshjen Beshiktash-Crvena Zvezda nuk ishte parë asnjëherë. Në tribuna ishin 5500 tifozë turq, përzier me shqiptarë Kosove që jetojnë prej shumë vjetësh në Turqi që nuk e lanë rastin t’i shpëtonte nga dora. Gazeta serbe “Kurir” shkruan se atmosfera ishte vdekësore, madje një lojtar turk edhe pështyu një lojtar të Zvezdës. Me dhjetra e qindra flamuj të kuq shqiptarë u valëvitën gjatë ndeshjes si dhe oshëtinë thirrjet “Kosova, Kosova” dhe “UÇK, UÇK”. “Basketbollistët e Zvezdës nuk ia kaluan bukur në Stamboll, shkruan “Kuriri”, jo vetëm u mundën nga Beshiktashi (81-69) në ndeshjen e kthimit të 1/8-ës së finaleve të Kupës ULEB duke mos u kualifikuar për më tej, por edhe u provokuan vazhdimisht nga tifozët turq që patën si armë kryesore tundjen e flamujve shqiptarë”. Salla e atij pallati sporti është tepër agresive sepse rreshtat e tifozëve janë deri fare pranë fushës ku luajnë basketbollistët. “Një torturë të ngjashme e provuan edhe basketbollistët e Partizanit pak ditë më parë kur luajtën ndaj Efes Pilsenit, por bardhekuqtë (Zvezda) pranojnë se nuk janë mësuar me një atmosferë të tillë që ndikoi edhe në humbje. Basketbollisti më i mirë i serbëve, Elmedin Kikanoviç (19 pikë) deklaroi pas ndeshjes se “ata (turqit) patën mbështetje fantastike nga publiku, duhet të pranoj se rrallë ndonjë prej nesh ka luajtur në një atmosferë të tillë”.