Freedom House: Shqipëria pjesërisht e lirë

Në raportin e fundit të organizatës Freedom House për lirinë e shtypit në botë për vitin 2009, Shqipëria është radhitur e 50-ta si pjesërisht e lirë.

Kosova është radhitur në vendin e 53 .
Karakteristikë e raportit të sivjemë është se Kosovën për herë të parë e trajton si shtet i veçantë.

Me të njëjtin vlerësim është klasifikuar Serbia në vendin e 35, Kroacia në vendin 40, Maqedonia në vendin e 46, ndërsa Bosnjë e Hercegovina në vendin e 48.

Raporti i Freedom House thotë se në vitin 2009 është shënuar rënie e lirisë së shtypit në mbarë botën.

Raporti thotë se gjatë 2009-ës, vetëm njëri nga gjashtë njerëz kanë jetuar në vend me liri të shtypit.

Turkmenistani, Uzbekistani, Bjellorusia dhe Irani radhiten ndër shkelësit më të mëdhej të lirisë së shtypit, ku "mediat e pavarura janë jo ekzistente ose mezi operojnë".

Irani ka marrë vlerësimet më të këqija në historinë 30 vjeçare të raporteve. Ky vend u radhit në mesin e dhjetë vendeve më shtypëse të mediave në botë në vitin 2009, gjë që u pasqyrua nga shtypja e gjerë e qeverisë ndaj gazetarëve pas rizgjedhjes së kontestuar të presidentit Mahmud Ahmadinexhad.

Në Rusi, liria e shtypit është përkeqësuar pak në 2009-ën, dhe nuk u cilësua si "e lirë" për të shtatën herë me radhë.

Vendet skandinave mbeten në krye të listës, me shkallën më të lartë të lirisë së shtypit në botë.