Genta si Lady Gaga

Në ndejën promovuese të albumit më të ri “Living your dream” të reperit Noizy, ishte dhe këngëtarja Genta Ismajli. Siç shihet dhe në fotot, ku ajo përqafon miqësisht babin e mbretit të mbrëmjes, Genta ka formuar një raport të ngushtë me Noizyn dhe familjen e tij, dhe këtë që prej sezonit të parë të “Dancing with the Stars”, ku siç na tregoi këngëtarja, ata e kanë mbështetur shumë.

Respekti që ajo gëzon për ta vihet re edhe në gjestin mjaft të këndshëm nga ana e saj, kur ajo u bashkohet festimeve me një tufë lulesh magjepsëse që ia drejton Noizyit për t’i uruar suksesin e arrirë. Një tjetër veçanti e këngëtares kosovare me mjaft sqimë dhe karakter janë gustot e saj në veshje dhe look-u i përgjithshëm.

Këtë radhë, veç flokëve ose “frizurës” mjaft ekstravagante me rrica, ajo përçon ekzagjerim pozitiv në zgjedhjet që bën për fustanin e shndritshëm në ngjyrë të verdhë, që e ndihmon të bjerë edhe më shumë në sy ajo dhe ngjyra e bukur e lëkurës.

Por, në fakt, më shumë sesa fustani vëmendjen na e marrin këpucët e zgjedhura prej Gentës, në stilin ‘alla’ Gaga. Është e vërtetë që shpeshherë kopjimi që artistët shqiptarë u bëjnë atyre të huaj sidomos në look lë tepër për të dëshiruar, ama në rastin e Gentës shihet se është veçse e inspiruar me detajet e modës më të fundit dhe duket rrezatuese e plot energji. (Bluetooth)