Geraldina Appony, kontesha hungareze që u bë mbretëresha e shqiptarëve
TIRANË, 30 dhjetor/ATSH/ 87 vjet më parë tokën shqiptare do e shkelte një konteshë hungareze që në rrethet e fisnikërisë së lartë evropiane njihej si “trëndafili i bardhë i Hungarisë”. Ishte kontesha Geraldina Appony e cila erdhi në Shqipëri pas marrjes së një ftese nga motrat e Mbretit Zogu I, të cilit i ishte treguar një foto e saj gjatë një balloje të organizuar në Budapest.
Kjo paranjohje mes tyre u ndërmor nga Sekretari i Zogut, Jak Koci dhe i dërguari hungarez, Cyczy.
Një muaj pas ardhjes, më 30 janar 1938, Geraldina u fejua me Mbretin Zogu I. Ndërsa, më 27 prill 1938, pasi vunë kurorë, u quajt “Mbretëresha e Shqiptarëve”.
Kontesha u lind në Budapest më 6 gusht 1915, kohë kur kish nisur shkërmoqja e Perandorisë Austro-Hungareze. Ndoqi shkollën angleze në Menton të Francës dhe më pas kolegjin “Sacred Heart” të Pressbaum-it, në Austri, ku kreu edhe Fakultetin e Shkencave Shoqërore dhe Financiare.
Duke u bërë pjesë e familjes mbretërore, Geraldina 22-vjeçare nisi të ushqente një mirëdashje për vendin, ku edhe do t’i sosej fryma.