Gjykata Speciale ndalon vizitat e 11 personave te Hashim Thaçi në Hagë

Gjykata Speciale e Kosovës në Hagë ka vendosur kufizimin e vizitave jo të privilegjuara për ish-presidentin e Kosovës, Hashim Thaçi, i cili po mbahet në paraburgim që nga nëntori i vitit 2020.

Sipas vendimit të lëshuar më 18 gusht 2025 nga gjyqtarja e procedurës paraprake, Marjorie Masselot, 11 individëve, përfshirë disa persona të afërt me Thaçin, u është ndaluar ta vizitojnë atë në objektin e paraburgimit të Dhomave të Specializuara të Kosovës.

Vendimi specifikon se ndalimi i vizitave jo të privilegjuara përfshin individë si Artan Behrami, Blerim Shala, Ismail Syla, Vllaznim Kryeziu, Milaim Ahmetaj, Milaim Cakiqi, Avni Kastrati, si dhe katër persona të tjerë, emrat e të cilëve janë të redaktuar për arsye konfidencialiteti.

Këta persona thuhet se e kanë vizituar Thaçin në paraburgim mes datave 1 korrik dhe 7 tetor të vitit 2023, dhe thuhet se përmenden edhe në vendimin e konfirmimit të akuzave kundër Thaçit.

Megjithatë, ky vendim lejon që Thaçi të vazhdojë të ketë kontakte me avokatët dhe ndihmës-avokatët e tij, pasi vizitat e privilegjuara nuk preken nga kufizimet.

Gjykata ka urdhëruar gjithashtu që kufizimet të rishikohen çdo tre muaj për të vlerësuar nëse ato janë ende të nevojshme, duke pasur parasysh zhvillimet në procesin gjyqësor.

Arsyet e Vendimit 

Prokuroria e Specializuar ka argumentuar se disa nga vizitorët e Thaçit, gjatë vizitave të mëparshme, janë angazhuar në komunikime me zë të ulët, të cilat mund të kenë shërbyer për të përcjellë udhëzime te palët e treta, përfshirë dëshmitarët e çështjes.

Sipas Prokurorisë, këto veprime përbëjnë rrezik për integritetin e procesit gjyqësor, veçanërisht në një kohë kur Thaçi përballet me një aktakuzë shtesë për pengim të drejtësisë.

Kjo aktakuzë e dytë lidhet me dyshimet se Thaçi dhe të pandehur të tjerë mund të kenë tentuar të ndikojnë te dëshmitarët e çështjes kryesore, e cila përfshin akuza për krime lufte dhe krime kundër njerëzimit gjatë dhe pas luftës në Kosovë (1998-2000).

Mbrojtja e Thaçit

Mbrojtja e Thaçit, e udhëhequr nga avokatja Sophie Menegon, e ka kundërshtuar ashpër vendimin, duke e quajtur atë të padrejtë dhe në shkelje të të drejtave themelore të Thaçit për jetën private dhe familjare, të garantuara nga Konventa Evropiane për të Drejtat e Njeriut.

Sipas mbrojtjes, kufizimet janë të panevojshme dhe të pabazuara, duke argumentuar se Prokuroria nuk ka ofruar prova të mjaftueshme për të justifikuar ndalimin e vizitave. Gjithashtu, mbrojtja ka njoftuar se do të apelojë vendimin dhe do të kërkojë heqjen e këtyre masave.

Hashim Thaçi, së bashku me ish-krerët e tjerë të Ushtrisë Çlirimtare të Kosovës (UÇK) si Kadri Veseli, Rexhep Selimi dhe Jakup Krasniqi, po gjykohen për akuza të rënda, përfshirë vrasje, torturë, zhdukje me forcë dhe krime të tjera të pretenduara gjatë luftës së Kosovës.

/rtsh.al/