Gjykata e Tiranës liron 12 protestuesit e arrestuar më 14 shtator

Gjykata e Tiranës ka liruar 12 protestuesit e arrestuar më 14 shtator. Trupa gjykuese ka vendosur ta cilësojë të paligjshëm arrestimin dhe nuk ka caktuar asnjë masë sigurimi ndaj tyre.

Gjykata e Tiranës i cilësoi të paligjshme arrestimet dhe liroi nga qelia 12 protestues të vënë në pranga ditën e parë të nisjes së shkollave teksa i bënë thirrje nxënësve të bojkotonin mësimin.

Jashtë gjykatës së Tiranës, një grup protestuesish qëndruan në mbështetje të personave që kishin dalë para togave të zeza.

Tubimi nisi në orën 07.00 të mëngjesit të 14 shtatorit, me një grup të vogël protestuesish që para gjimnazit “Qemal Stafa” u ndalën me thirrje ndaj nxënësve për t’iu bashkuar tubimit.

Policia tha se pati cenim të perimetrit të sigurisë në shkollë dhe i referoi materialet në prokurorinë e Tiranës për veprën penale “shtyrje e të miturve në krim”, por sot, gjykata i liroi.

Mes 12 të arrestuarve ishte dhe një prej organizatorëve kryesore të protestave anti-qeveritare, Visuar Dalipit, dhe një përfaqësues i Diasporës, Artan Daci.

Gjatë shoqërimeve u shënua dhe një incident, goditja ne bark e një protestuesi që solli pezullimin e policit.

Protestuesit që u liruan

Visuar Dalipi Ermelind Kuka Dorjan Balla Artan Daci Ervis Beqaj, Ramazan Dauti Bekim Imeraj Axhim Micalliu Aleandro Ahmetsulaj Ridvan Kamberi Klodian Bajrami Enrik Xhemalaj