Gratë moldave, histori suksesi- Nga kuzhina e shtëpisë në sipërmarrje moderne falë granteve të BE

Nga një kuzhinë e vogël shtëpie, në laboratorë modernë pastiçerie dhe linja prodhimi çokollate, gratë në Moldavi po shndërrohen në lidere të suksesshme të biznesit.

Diana Besliu e nisi ëndrrën e saj duke gatuar tortën e parë për djalin, por sot ajo drejton një sipërmarrje me 14 punonjës në qytetin Ungheni. Suksesi i saj u mbështet fort nga tre grante europiane me vlerë 28 mijë euro, të cilat i shërbyen për të blerë pajisje profesionale dhe frigoriferë.

Për Dianën, ky investim nuk ishte thjesht financiar, por një mundësi për të fituar pavarësi dhe për të thyer muret e një shoqërie patriarkale. Rrugëtimin e saj e ndjek edhe Liza Dulgheru, e cila prodhon çokollata ushqyese me mjaltë dhe arra falë një mbështetjeje prej 30 mijë eurosh nga Bashkimi Europian.

Liza tregon se përvoja e fituar gjatë një stazhi në Gjermani e ndihmoi të ndërtonte një plan biznesi të qëndrueshëm që sot po lulëzon në vendlindje. Përveç parave, këto sipërmarrëse kanë përfituar trajnime të vazhdueshme për të mësuar sekretet e menaxhimit dhe rritjes së bizneseve.

Rajoni i Unghenit në Moldavi është kthyer në një vatër zhvillimi ku mbi 80 ndërmarrje të vogla kanë përfituar financime direkte për projekte sociale dhe bujqësore.

Këto histori suksesi janë dëshmia e gjallë se me mbështetjen e duhur, gratë mund të shndërrojnë pasionet e tyre në motorë të rëndësishëm ekonomikë.

Kështu, dëshira për progres dhe mbështetja europiane po ndryshojnë rrënjësisht realitetin e familjeue dhe komuniteteue në të gjithë Moldavinë.

Gazetar: Artur Mata

/rtsh.al/