Greqia pret me greva, Trojka rrit presionin për masat

Ekspertët nga Fondi Monetar Ndërkombëtar, nga Banka Qendrore Europiane dhe nga Komisioni Europian, të cilët kanë vizituar Greqinë për të parë përparimin që do të sillnin masat e saj të kursimit, janë shprehur të pakënaqur me përpjekjet e qeverisë. “Është e qartë që plani i kursimeve nuk funksionon deri tani”, janë shprehur ata. “Vendi bën dy hapa para dhe një prapa”, u tha në raport. Sipas Pol Matias Tomsen, përfaqësues i FMN-së në trojkë, nevojiten reforma shumë më të ashpra. Krerët e shteteve dhe të qeverive të eurozonës e varin pagesën e transhit të ri të ndihmës për Greqinë nga një gjykim pozitiv i së ashtuquajturës trojkë. Pa kredi të reja, Greqia nuk do të ishte e aftë të paguante as pagat e pensionet në nëntor. Çdo ditë qytetet kryesore të këtij vendi janë të mbushur me protestues, që nga ata të grevave kombëtare, e deri te sektorët e veçantë, në ditë të veçanta, si transporti, arsimi, spitalet, etj.