Grupet joformale rinore dhe bashkitë pjesë e programeve të Agjencisë Kombëtare të Rinisë

TIRANË, 11 shkurt /ATSh/ Këshilli i Ministrave ka miratuar sot disa ndryshime për mënyrën e krijimit, organizimit dhe funksionimit të Agjencisë Kombëtare të Rinisë (AKR).

Në përmbushje të legjislacionit në fuqi dhe me propozimin e ministrit të Kulturës, Turizmit dhe Sportit, vendimi synon të forcojë mbështetjen për të rinjtë dhe grupet joformale rinore.

Ndryshimet kryesore përfshijnë: përfshirjen e bashkive dhe grupeve joformale rinore në programet dhe aktivitetet e AKR; Zbatimin e Programit të Talenteve Rinore, përfshirë publikimin e thirrjeve për aplikim, menaxhimin e procesit të përzgjedhjes dhe akordimin e mbështetjes financiare për të rinjtë;

Mbështetje financiare për veprimtarinë e Këshillit Kombëtar të Rinisë dhe për trajtimin ushqimor dhe trajnimin e të rinjve gjatë praktikave 3-mujore në kuadër të Programit Kombëtar të Praktikave të Punës (PKPP);

Zëvendësimin e emërtimit të ministrisë përgjegjëse nga “Ministria e Arsimit, Sportit dhe Rinisë” me “Ministria e Turizmit, Kulturës dhe Sportit”.

Ministria e Kulturës, Turizmit dhe Sportit dhe Agjencia Kombëtare e Rinisë do të jenë përgjegjëse për zbatimin e këtij vendimi, i cili hyn në fuqi pas botimit në “Fletoren Zyrtare”.

/a.f/r.e/