Hapësira ajrore mbi Teheran është mbyllur, Taremi nuk mund të udhëtojë drejt Kalifornisë

Irani i Mehdi Taremit është në një konflikt të hapur me Izraelin dhe sulmuesi iranian i Interit nuk ka mundur të niset për në SHBA për t’u bashkuar me ekipin në grumbullim. Fluturimi i tij nga Teherani drejt Kalifornisë ishte planifikuar për sot, dhe Mehdi ishte paraqitur rregullisht në aeroportin e kryeqytetit iranian, por është detyruar të kthehet për arsye sigurie. Edhe aeroporti civil është mbyllur për shkak të gjendjes emergjente. Ndërkohë që lufta përshkallëzohet dhe bombardimet vazhdojnë nga të dyja palët, e gjithë hapësira ajrore është mbyllur.

Interi është në kontakt të vazhdueshëm me Taremin dhe në orët në vijim do të kërkohet një zgjidhje – jo e lehtë në këtë kontekst – për ta bërë të mundur nisjen e tij. Edhe pse vetë Taremi dëshiron të bashkohet sa më shpejt me shokët e skuadrës, siguria ka përparësi ndaj Kupës së Botës për Klube. Aktualisht, trajneri Chivu mund të mbështetet vetëm te dysheja e zakonshme Thuram–Lautaro, ndërsa pas tyre janë vetëm Sebastiano Esposito dhe Valentin Carboni, ky i fundit sapo i rikthyer pas një mungese të gjatë. Ndërkohë, vëllai i Sebastianos, Pio, është ende në fazë rikuperimi nga një dëmtim muskulor dhe pritet të jetë gati vetëm për ndeshjen e tretë ndaj River Plate.