Helikopterët e KFOR-it sulmohen në veri të Kosovës

Foto ilustruese

E mërkurë, 27 korrik 2011, NOA- Veriu i Kosovës është trazuar sërish pasditen e sotme pasi dy helikopterë të KFOR-it, të kontingjentit kroat, u sulmuan me armë zjarri.

Ky lajm është konfirmuar nga Ministria e Mbrojtjes së Kroacisë si dhe nga ana e vetë KFOR-it dhe komandanti i tij Erhard Buhler.

Sipas tyre deklarohet se helikopterët transportues Mi171, janë gjuajtur me armë zjarri nga toka, por theksohet se ekipuazhi i helikopterëve nuk ka vënë re të shtënat, për shkak të zhurmës së fluturimit.

Lidhur me këtë sulm Buhler është shprehur se, Apeloj tek të gjithë që të mos pengojnë punën e KFOR-it. Nuk e them këtë pa arsye, sepse është shtënë ndaj helikopterit të KFOR-it.

Theksohet sakaq se helikopterët kanë kryer detyrën në kuadër të misionit gjerman të KFOR-it dhe në asnjë rast nuk kanë dalë nga kuadri i misionit të tyre, në kuadër të trupave të NATO-s në Kosovë.

a.y/NOA