Humb jetën aksidentalisht fermeri në Libofshë të Fierit, përmbyset mjeti bujqësor dhe e zë poshtë

Një aksident gjatë punës i ka marrë jetën një fermeri në fshatin Libofshë të Fierit. Ngjarja e rëndë është shënuar në orët e para të mëngjesit të së dielës (14 dhjetor), teksa viktima po punonte tokën e tij bujqësore me traktor.

Sipas burimeve nga vendngjarja, dyshohet se gjatë procesit të punës mjeti bujqësor e ka goditur fermerin, duke i shkaktuar vdekjen e menjëhershme.

Policia është njoftuar menjëherë dhe ka mbërritur në vendngjarje, ku po kryen veprimet hetimore për të zbardhur plotësisht rrethanat e aksidentit tragjik.

“Në datë 14.12.2025, në fshatin Libofshë, shtetasi Xh. P., 62 vjeç, duke punuar tokën me mjet zetor, dyshohet se mjeti është përmbysur dhe e ka zënë poshtë shtetasin Xh. P., i cili për pasojë ka humbur jetën. Grupi hetimor po punon për zbardhjen e rrethanave të rastit”, njofton policia.

/rtsh.al/