Hungaria refuzon fondet shtesë të BE-së për Ukrainën, Orban: Absurde, të përgjigjen ku shkuan 70 miliardë eurot e mëparshme

Hungaria kundërshton planet e Komisionit Evropian për t’i dhënë më shumë para Ukrainës. Kryeministri Viktor Orban ka deklaruar se Hungaria nuk është e gatshme të kontribuojë me para shtesë për të financuar kostot e rritura të shërbimit të borxhit të BE-së.

“Një gjë është e qartë, ne hungarezët nuk do t’i japim më shumë para Ukrainës derisa të thonë se ku kishin shkuar fondet e mëparshme me vlerë rreth 70 miliardë euro”, tha Orban. Ky i fundit në fjalën e tij në samitin e BE-së në Bruksel, e cilësoi qesharake e absurde kontributin shtesë ndaj Ukrainës.

“Dhe ne e shohim krejtësisht qesharake dhe absurde që duhet të kontribuojmë më shumë para për të financuar kostot e shërbimit të borxhit të një kredie nga e cila ende nuk kemi marrë fondet që kemi të drejtë të marrim”, tha Orban.

Një ditë më parë (29 qershor), liderët e BE-së deklaruan se do të merrnin angazhime afatgjata për të forcuar sigurinë e Ukrainës, ndërsa presidenti i Ukrainës Volodymyr Zelensky u kërkoi atyre të fillonin punën për një raund të ri sanksionesh kundër Rusisë .

Orban tha se nuk kishte asnjë shans që vendet anëtare të Bashkimit Evropian t’i miratonin këto plane financiare.

/rtsh.al/