I dënuar me 20 vjet burg në Itali për trafik droge, sekuestrohen pasuritë e Alket Hatijas

TIRANË, 18 dhjetor/ATSH/ Sektori për Hetimin e Krimeve Ekonomiko-Financiare i Drejtorisë Vendore të Policisë Durrës, në bashkëpunim me Agjencinë e Administrimit të Pronave të Konfiskuara dhe Sekuestruara ka sekuestruar disa pasuri të paluajtshme që janë përfituar nga veprimtaria kriminale e shtetasit Alket Hatija, i dënuar me 20 vjet burgim nga autoritetet gjyqësore italiane, për trafikim të lëndëve narkotike.

Sipas njoftimit për shtyp të DVP Durrës, në kuadër të operacionit policor të koduar “Konfiskimi” u ekzekutua vendimi i Gjykatës së Posaçme për Korrupsionin dhe Krimin e Organizuar për konfiskimin e disa pasurive të paluajtshme, të cilat ky shtetas i kishte regjistruar në emër të vet dhe të familjarëve të tij, konkretisht: 1 sipërfaqe toke truall, 1 garazh dhe 1 apartament në Durrës, si dhe 1 apartament në Kavajë.

Shtetasi Alket Hatija, gjatë periudhës 2003-2004, ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali. Ai ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast).

Materialet procedurale i kaluan Prokurorisë, për veprime të mëtejshme.  /k.s/j.p/