I dërguari kinez bën thirrje për t’i dhënë fund kolonializmit mbi Malvinet
Zëvendëspërfaqësuesi i përhershëm i Kinës në Kombet e Bashkuara bëri thirrje për përpjekje ndërkombëtare për t’i dhënë fund kolonializmit dhe shpjegoi pozicionin e Kinës për ishujt Malvine, shkruan CRI.
Çështja e ishujve Malvine, të njohur gjithashtu si Folkland, është në thelb një trashëgimi e kolonializmit, theksoi Geng Shuang.
Duke folur në një sesion të Komitetit të Posaçëm të OKB-së për Çkolonizimin, ai u shpreh se kolonializmi i ka sjellë botës vuajtje të mëdha dhe ka lënë një faqe jashtëzakonisht të turpshme në historinë njerëzore. Sot, në shekullin e 21-të, ka kaluar koha kur kolonialistët perëndimorë kishin vullnet të lirë. Sidoqoftë, në marrëdhëniet ndërkombëtare, mendimi kolonial, politika e forcës dhe ngacmimi, të cilat kanë të njëjtën origjinë me kolonializmin, ende shfaqen në forma të ndryshme, duke ndikuar seriozisht në rendin normal ndërkombëtar dhe duke minuar rëndë sovranitetin, sigurinë dhe të drejtat e zhvillimit të vendeve përkatëse, si dhe stabilitetin e tyre politik, ekonomik e shoqëror, tha Geng Shuang.
Sipas tij, Britania dhe fuqitë e tjera administruese duhet të përmbushin detyrimet e tyre ndërkombëtare në përputhje me rezolutat përkatëse të OKB-së dhe të mbrojnë të drejtat e ligjshme të njerëzve në territoret jo të vetëqeverisura.
Nga lufta e vitit 1982 midis Britanisë dhe Argjentinës(Foto:VCG)
Pozicioni i Kinës për çështjen e ishujve Malvine ka qenë konsekuent, tha ai, duke shtuar se Kina mbështet pretendimin e Argjentinës për sovranitet mbi ishujt Malvine. “Kina ka qenë gjithmonë për zgjidhjen e mosmarrëveshjeve territoriale midis vendeve nëpërmjet negociatave paqësore në përputhje me qëllimet dhe parimet e Kartës së OKB-së. Shpresojmë që Britania t’i përgjigjet në mënyrë aktive kërkesës së Argjentinës dhe të fillojë dialogun e negociatat sa më shpejt të jetë e mundur, me qëllim që të gjendet një zgjidhje paqësore, e drejtë dhe e qëndrueshme në përputhje me rezolutat përkatëse të OKB-së,” u shpreh ai.
Argjentina dhe Britania kanë pasur mosmarrëveshje mbi sovranitetin e ishujve Malvine për dekada, çka çoi në një luftë të shkurtër në vitin 1982. Malvinet, ose ishujt Folkland siç i quajnë britanikët, kontrollohen nga Britania, por Argjentina thotë se janë pjesë e territorit të saj.