Igli Toska I thekur pas birrës

Në festën e birrës të organizuar te Kodrat e Liqenit Artificial gjatë fundjavës që shkoi, një nga fytyrat më publike që dallohej më shumë mes turmës së njerëzve të mbledhur aty ishte edhe ish-ministri i Rendit Publik, Igli Toska. Me një veshje sportive dhe i rrethuar nga miqtë e tij, ai ka kthyer disa gota me birrë njëra pas tjetrës. Nën shoqërinë e një muzike të zgjedhur dhe nën një atmosferë relaksuese, Igli ka preferuar të festojë me birra, si gjithë njerëzit e tjerë. E të mendosh që temperaturat e larta gjatë mbrëmjes nuk të linin as të merrje frymë, për ish-ministrin kjo ka qenë me pak fjalë zgjidhja ideale për të kaluar një natë ndryshe.

Arbër Çepani

“Do të ndihmoj edhe Kosovën”

Gjatë qëndrimit disaditor këtë fundjavë në Kosovë, fituesi i çmimit të madh të “reality show”-t, tashmë i përfunduar, Arbër Çepani, ka premtuar se një pjesë të parave të fituara do t’i përdorë në ndihmë të familjeve kosovare në nevojë. Këto komente ai i ka bërë për gazetën “Epoka e re”, në të cilën ai ka folur edhe për qëllimin e vizitës së tij në Kosovë. Bëhet e ditur se Arbëri që prej ditës së parë kur ka fituar çmimin e madh, ka ngritur një grup që do të ndjekë mënyrën e administrimit të parave qindarkë për qindarkë. Që përpara hyrjes në shtëpinë e famshme, ai kishte deklaruar që, nëse do të ishte fitues, të gjitha paratë do t’i jepte për bamirësi. Pritet që këto ditë Arbëri të udhëtojë sërish drejt Kosovës, ku me grupin e tij të punës do të bëjë shpërndarjen e një shume të hollash për familjet kosovare në nevojë.

Look-u i ri i Rezartës

Nëse nuk është ajo në koherencë me tendencat e fundit të modës, kush mund të jetë tjetër! Stilistja e njohur Rezarta Skifteri është shfaqur në publik me look-un e saj të ri sa i takon frizurës. Flokë me fije dhe të prera shkurt, janë modeli i ri i zgjedhur i Rezartës, pas performancës së fundit gjatë sfilatës që mbante vulën e emrit të saj. Me një veshje tërësisht casual, stilistja të jep përshtypjen e një çupëline 20-vjeçare dhe jo atë të një mamaje. Shpesh Rezarta preferon që të luajë me look-un e saj, për të qenë sa më ndryshe dhe sa më moderne.