Inteligjenca artificiale, BE i jep dritën jeshile rregullatorit! Ndalohet përdorimi i pajisjeve për njohjen e fytyrës

Parlamenti i BE-së i ka dhënë miratimin e parë AiAct, dokumenti që vendos për herë të parë rregullat e reja evropiane për inteligjencën artificiale. Teksti u miratua nga komisionet e Drejtësisë dhe Tregut të Brendshëm të Eurodhomave me 84 vota pro, shtatë kundër dhe 12 abstenime. Ndër masat e parashikuara është edhe ndalimi total i përdorimit të teknologjive të inteligjencës artificiale për njohjen e fytyrës në vendet publike në BE.

Objektivi i dispozitës së miratuar është të garantojë një zhvillim njerëzor dhe etik të inteligjencës artificiale në Evropë, duke vendosur rregulla të reja të transparencës dhe menaxhimit të rrezikut.

Në amendamentet e tyre në propozimin e Komisionit, eurodeputetët synojnë të sigurojnë që sistemet e inteligjencës artificiale të mbikëqyren nga njerëzit, të jenë të sigurta, transparente, të gjurmueshme, jo-diskriminuese dhe miqësore me mjedisin. Përpara negociatave me Këshillin për formën përfundimtare të ligjit, ky projekt-mandat negociator duhet të miratohet nga i gjithë Parlamenti gjatë seancës së tij në datat 12-15 qershor./ TGCOM

/rtsh.al/