Ish-zëvendëspresidenti i Trump, Mike Pence kritikon planet tarifore
Tarifat e Trump kanë tërhequr disa kritika të forta nga ish-zëvendëspresidenti i tij, Mike Pence, i cili rrallë here flet kundër ish-shefit të tij në publik.
Në një postim në X, Pence i quan tarifat “rritja më e madhe e taksave në kohë paqeje në historinë e SHBA. Këto tarifa janë gati 10 herë më të mëdha se ato të vendosura gjatë administratës Trump-Pence dhe do t’i kushtojnë familjeve amerikane mbi 3,500 dollarë në vit”.
Pence gjithashtu postoi një artikull këtë mëngjes nga Bordi Redaktues i Wall Street Journal, i titulluar Epoka e Re Proteksioniste e Trump, i cili thotë se “hedhja në erë e sistemit tregtar botëror ka pasoja që presidenti nuk po i reklamon”.
Advancing American Freedom, një organizatë për mbrojtjen e politikave e themeluar nga Pence, ka qenë e zëshme në kritikat e saj ndaj planeve tarifore të Trump. Grupi ka argumentuar se tarifat e Trump “janë në thelb një taksë për konsumatorët dhe bizneset amerikane”.
Më parë, zëvendëspresidenti aktual i Trump, JD Vance, mbrojti fuqishëm shefin e tij duke thënë se ekonomia amerikane do të bëjë një “ndryshim të madh”.
/rtsh.al/