Italia: Diplomacia është qasja e duhur për Ngushticën e Hormuzit

Ministri i Jashtëm italian, Antonio Tajani, ka deklaruar se diplomacia është mënyra më e përshtatshme për t’u marrë me situatën e tensionuar në Ngushticën e Hormuzit.

Ai theksoi se nuk ekziston aktualisht ndonjë mision detar që mund të zgjerohet për të përfshirë këtë korridor strategjik.

Nga ana tjetër, Ministri i Jashtëm gjerman Johannes Wadephul hodhi poshtë kërkesat e Presidentit amerikan Donald Trump për vendosjen e forcave të NATO-s në rajon.

Wadephul tha se nuk e sheh NATO-n të bëhet përgjegjëse për Ngushticën e Hormuzit, duke shtuar se nëse aleanca ka juridiksion, organet e saj do ta shqyrtojnë çështjen në mënyrë të përshtatshme.

Ai shtoi se Gjermania dëshiron të punojë brenda kornizës së BE-së për vendosjen e sanksioneve ndaj atyre që janë përgjegjës për mbylljen e ngushticës, si një sinjal mbështetjeje për partnerët në rajonin e Gjirit.

Presidenti Trump, në një intervistë për Financial Times, kishte bërë thirrje me tone të forta që aleatët e NATO-s të ndihmojnë në sigurimin e dërgesave të naftës përmes Ngushticës së Hormuzit, duke paralajmëruar se mungesa e përgjigjes do të ishte e dëmshme për të ardhmen e aleancës.

Ndërkohë, Greqia ka refuzuar të marrë pjesë në ndonjë operacion ushtarak në Hormuz. Zëdhënësi i qeverisë, Pavlos Marinakis, tha se vendi do të angazhohet vetëm në misionin detar të BE-së në Detin e Kuq (ASPDES), i cili ka për detyrë mbrojtjen e anijeve në atë zonë.

Danimarka, përmes ministrit të saj të jashtëm Lars Rasmussen, shprehu se si një komb detar duhet të mbetet e hapur ndaj diskutimeve për kontributin në sigurimin e lundrimit në Hormuz.

Rasmussen theksoi se vendi ka një interes të qartë për të garantuar lirinë e lundrimit dhe se mezi pret ta diskutojë këtë çështje me kolegët e tij në BE.

Shefja e politikës së jashtme të BE-së, Kaya Callas, konfirmoi se po shqyrtohet mundësia e zgjerimit të mandatit të “Operacionit Aspidis” – misioni i BE-së në Detin e Kuq – për të përfshirë edhe Ngushticën e Hormuzit. Sipas saj, kjo do të ishte mënyra më e shpejtë për 27 shtetet anëtare që të rrisin sigurinë në rajon.

Operacioni Aspidis u nis në vitin 2024, në kohën kur rebelët Huthi po synonin anijet pranë brigjeve të Jemenit, në lidhje me luftën në Rripin e Gazës. Aktualisht, misioni përbëhet nga tre anije luftarake: franceze, greke dhe italiane.

/rtsh.al/