Jahjaga: Dialogu me Serbinë, do të ketë sukses

Presidentja Atifete Jahjaga është takuar me ambasadorin e Mbretërisë së Bashkuar në Kosovë, Ian Cliff, i cili e ka përgëzuar presidenten për zgjedhjen e saj dhe ka thënë se vendi i tij do të vazhdojë përkrahjen për Kosovën në të gjitha fushat.
 

Ambasadori britanik ka vlerësuar se është e një rëndësie të veçantë, perspektiva e qartë evropiane për Kosovën dhe avancimi i saj, së bashku me vendet e tjera të rajonit, drejt anëtarësimit në BE. Ai tha se dialogu me Beogradin është i rëndësishëm dhe se zgjidhja e problemeve praktike është jetike.
 

Ndërkaq, presidentja Jahjaga ka deklaruar se Kosovës i duhet vendosja e një marrëdhënieje kontraktuale me BE-në mënyrë që të qartësohet e ardhmja e saj. Ajo tha se Kosova po i kushton kujdes marrëdhënieve me shtetet fqinje në mënyrë të veçantë marrëdhënieve me Serbinë, posaçërisht dialogut që po zhvillohet në Bruksel me lehtësimin e Bashkimit Evropian.
 

Presidentja tha se dialogu do të ketë sukses, pasi palët do të gjejnë vetëm zgjidhje evropiane që janë në interes të të dy popujve dhe të dyja vendeve.