KOMENT – Ndërsa lufta në Ukrainë hyn në një periudhë kritike, BE-ja ecën përpara pa SHBA-në

BRUKSEL, 28 shtator /ATSH/- Ndërsa lufta në Ukrainë po hyn në një periudhë kritike, Bashkimi Evropian ka vendosur se duhet të marrë përgjegjësinë për atë që e sheh si një kërcënim sigurie dhe po përgatitet të ofrojë një pjesë të barrës financiare, ndoshta edhe pa Shtetet e Bashkuara të Amerikës, sipas AP.

BE-ja rrallëherë ecën përpara në çështjet ndërkombëtare pa SHBA-në, veçanërisht duke përfshirë konflikte të mëdha, por shpreson se ky vendim do të inkurajojë vendet e tjera të japin ndihmën e tyre.

Të dërguarit e BE-së kanë punuar këtë javë mbi një propozim për t’i dhënë Ukrainës një paketë kredie me vlerë deri në 35 miliardë euro (39 miliardë dollarë).

“Në mënyrë thelbësore, kjo kredi do të rrjedhë drejtpërdrejt në buxhetin tuaj kombëtar”, tha presidentja e Komisionit Evropian Ursula von der Leyen, në Kiev javën e kaluar.

“Do t’ju ofrojmë hapësirë ​​fiskale të konsiderueshme dhe shumë të nevojshme. Ju do të vendosni se si t’i përdorni më mirë fondet, duke ju dhënë fleksibilitet maksimal për të përmbushur nevojat tuaja”, tha ajo.

Zelensky kërkon të blejë armë dhe strehimore për bomba dhe të rindërtojë rrjetin e shkatërruar të energjisë të Ukrainës ndërsa dimri po afron.

Pothuajse 1000 ditë që nga pushtimi i tyre në shkallë të plotë, forcat ruse po përparojnë në lindje. Ushtria e Ukrainës ka një kontroll të lëkundur në një pjesë të rajonit të Kurskut në Rusi, gjë që ka dhënë një nxitje të përkohshme morale.

Politikisht, Zelensky shpreson të sigurojë mbështetje për një “plan fitoreje” që mund të detyrojë presidentin rus Vladimir Putin të ulet në tryezën e bisedimeve.

Ai po përpiqet të bindë presidentin e SHBA-së Joe Biden dhe aleatët e tjerë që të ndihmojnë në forcimin e Ukrainës, në çdo bisedim të ardhshëm.

Por zgjedhjet në SHBA janë afër dhe sondazhet parashikojnë një garë të ngushtë midis ish-presidentit Donald Trump dhe zëvendëspresidentes Kamala Harris.

Trump, i cili ka qenë kritik për ndihmën e SHBA-së për Ukrainën, tha të mërkurën se Zelensky duhet të kishte bërë lëshime ndaj Putinit përpara se të fillonte pushtimi në shkurt 2022.

Shumica e 27 vendeve të BE-së kanë frikë se një fitore e Putinit mund të çojë në pasiguri serioze. //a.i/