KQZ: Ja partitë që do të numërojnë fletët e votimit më 25 prill
Fletët e votimit, në zgjedhjet e 25 prillit, do të numërohen nga grupet e numërimit me 2 anëtarë të PS, 1 të PD dhe 1 të LSI. Komisioni Qendror i Zgjedhjeve vendosi ditën e sotme që anëtari i katërt i grupit të numrimit të jetë përfaqësues nga Lëvizja Socialiste për Integrim, duke i hequr mundësinë PDIU të kishte anëtarin e saj, ndonëse kjo forcë politike kishte më shumë se 2 mandate në zgjedhjet e kaluara. Celibashi e argumentoi vendimin e tij me faktin që, PDIU ishte pjesë e koalicionit PD e Aleanca për Ndryshim, dhe nuk garonte si subjekt më vete.
“PDIU nuk është subjekt zgjedhor, pasi nuk garon me listën e vet, por me kandidatë në koalicionin e Partisë Demokratike dhe Aleanca për Ndryshim, i cili është subjekti zgjedhor që merr pjesë në zgjedhje, e për këtë arsye nuk mund të ketë numërues veçantë koalicionit” tha Celibashi.
Vendimi i Kryekomisionerit: “Partia politike e shumicës parlamentare, që ka të drejtë të propozojë anëtarin e tretë të Grupeve të Numërimit të Votave për zgjedhjet për Kuvendin të datës 25.03.2021, është Partia Socialiste e Shqipërise.
- Partitë politike të opozitës parlamentare, që kanë të drejtë të propozojnë anëtarin e katërt të Grupeve të Numërimit të Votave, për zgjedhjet për Kuvend të datës 25.03.2021, është LSI.
- Ky vendim hyn nё fuqi menjёherё dhe publikohet në faqen zyrtare të KQZ-së.
- Kundër këtij vendimi mund të bëhet ankim brenda 3 (tre) ditëve në Komisionin Ankimimeve dhe Sanksioneve.