Kabineti për qeverisje të mirë për Prishtinën, zyrtarizohet këtë javë

Kabineti për Qeverisje të mirë për Prishtinën, i Partisë Demokratike të Kosovës (PDK), pritet që të zyrtarizohet në fund të kësaj jave dhe se që nga fillimi i javës së ardhshme do të filloj punën. Kështu ka thënë sot zëdhënësi i Partisë Demokratike të Kosovës (PDK) Blerand Stavileci, sipas të cilit emrat të cilët do ta përbëjnë këtë kabinet, do të bëhen të ditur në fund të kësaj jave.

“Kabineti shumë shpejt. Brenda disa ditësh do ta kemi konferencën e ardhshme. Më së largu deri në fund të kësaj jave, ne do t’i prezantojmë siç ju kemi premtuar kohë më parë emrat e përvetshëm të ekipit, i cili do ta udhëheqë. Ajo pse pak është vonuar, ka qenë më shumë shkaku i zgjedhjeve në Ferizaj, por këtë e kemi paralajmëruar edhe më herët”, ka thënë ai.

Ndërsa i pyetur se a do të jetë ai në krye të tij, ashtu siç është përmendur kohë më parë, Stavileci hezitoi të jap një përgjigje konkrete, mirëpo pohoi se ai do të jetë pjesë e këtij kabineti.

“Unë do të jem pjesë e kabinetit. Mbetet të gjithë emrat të zyrtarizohen dhe për hir të atyre që do të jenë pjesë e ekipit, e kemi lënë në konferencën e ardhshme t’i tregojmë gjithë këta emra”, ka thënë Blerand Stavileci, zëdhënësi PDK-së.