Kapshticë, fluks emigrantësh në doganë

Fluks emigrantësh në pikën doganore të Kapshticës. Këtë fundjavë kanë hyrë nga Greqia për në Shqipëri më shumë se 3600 udhëtarë, kryesisht emigrantë që vijnë me autoveturat e tyre.

Në Doganën e Kapshticës janë regjistruar afro 1200 automjete, pjesa më e madhe e të cilave autovetura, por edhe autobusë të linjave Athinë-Korçë dhe Selanik-Korçë.

Burime të policisë kufitare në Kapshticë thanë se hyrja e më shumë se 3600 emigrantëve gjatë ditës së diel ka shënuar një rritje të ndjeshme të të ardhurve nga Greqia për pushimet e verës dhe një fluks të udhëtarëve.

Për të përballuar në kohë sa më të shkurtër fluksin dhe shmangur radhët e gjata të njerëzve e automjeteve, në Doganën e Kapshticës ditën e diel është punuar me 6 sportele në hyrje.

Edhe pse numri i të ardhurve ka qenë në rritje, nuk janë krijuar radhë dhe pritje për emigrantët në sportelet e doganës.

Procedurat e kalimit të kufirit kryhen në një kohë sa më të shkurtër, sepse nga ana e policisë kufitare shqiptare procedohet vetëm me vendosjen e vulave hyrëse.

Gjatë muajit korrik, nga kjo pikë e kalimit kufitar kanë hyrë afro 1500 persona çdo ditë, një numër ky lehtësisht i përballueshëm nga policia kufitare për të mos krijuar probleme në qarkullimin e tyre.

Sipas autoriteteve të policisë kufitare në këtë doganë, numri i emigrantëve pritet të vijë në rritje gjatë muajit gusht dhe kjo është vënë re që këtë fundjavë me dyfishimin e tyre.