Kërkuan pavlefshmëri të akteve në dosjen “Partizani”, GJKKO rrëzon Berishën dhe Malltezin

Gjykata e Posaçme ka rrëzuar kërkesat e mbrojtjes për pavlefshmërinë e akteve të administruara në hetimet e dosjes “Partizani”, ku të akuzuar janë kryedemokrati Sali Berisha, dhwndri i tij Jamarbër Malltezi dhe biznesmeni Fatmir Bektashi.

Në vendimin e shpallur sot, gjykata vlerësoi se pretendimet e mbrojtjes janë të pabazuara në ligj, duke theksuar se nuk ekziston asnjë vendim për ndalimin e ushtrimit të profesionit ndaj prokurores Irena Gjoka dhe se caktimi i ekspertëve është kryer konform ligjit.

Sipas trupës gjykuese, asnjë nga aktet e SPAK-ut nuk rezulton i pavlefshëm, ndërsa kërkesat për pavlefshmëri absolute u rrëzuan si të pabazuara.

Gjatë seancës, prokurorët Arben Kraja dhe Enkelejda Millonai paraqitën rezultatet e hetimeve paraprake, sipas të cilave Fatmir Bektashi u ka premtuar Berishës dhe Malltezit një pjesë të të ardhurave nga privatizimi dhe ndryshimi i destinacionit të kompleksit “Partizani”.

SPAK akuzon Bektashin për korrupsion aktiv dhe pastrim parash, ndërsa Berishën dhe Malltezin për korrupsion pasiv.

Procesi pritet të vijojë me administrimin e provave të prokurorisë.

/rtsh.al/