Kolegji në 12:00 jep vendimin për Këshillin Bashkiak

Kolegji Zgjedhor pritet që në orën 12:00 të japë vendimin për ankimimin e Partisë Demokratike për shpërndarjen e mandateve të Këshillit Bashkiak për Bashkinë e Tiranës.

Kolegji kërkoi që gjatë seancës të jenë të pranishëm edhe përfaqësues të opozitës, për t`u njohur me shpërndarjen e mandateve, ndërsa u kërkoi përfaqësuesve të PD-së edhe listën e mandateve për Këshillin Bashkiak.

Në ankimimin e Partisë Demokratike kërkohet nga ana e Kolegjit që të caktojë mandatet për këshillin bashkiak të Tiranës mbi bazën e tabelave të grupeve të numërimit për secilën qëndër votimi. Komisioni Qëndror i Zgjedhjeve nuk ka mundur të miratojë me 5 vota pro, aktin për shpërndarjen e mandateve për anëtarët e Këshillit Bashkiak të Tiranës.

Me katër vota pro dhe dy kundër, KQZ-ja nuk ka mundur t`i japë vlerë aktit të saj, për shkak se në bazë të Kodit Zgjedhor, ndarja e mandateve duhet të bëhet me të paktën 5 vota pro.

Më herët KQZ sipas përllogaritjes së tabelës përfundimtare tha se koalicioni "Aleanca për Qytetarin" do të ketë 28 këshilltarë dhe "Aleanca për të Ardhmen" 27 këshilltarë. Shorti i cili u zhvillua disa ditë më parë përcaktoi relatore të Neriban Mullain, ndërsa anëtarë të tjerë të trupës së gjykimit do të jenë Entela Prifti, Tom Ndreca, Petraq Dhimitri dhe Astrit Kalaja.