Komuniteti LGBTI marshim në Tiranë
TIRANË, 23 maj/ATSH/ Komuniteti LGBTI zhvilloi sot në Tiranë paradën vjetore të krenarisë, një aktivitet i organizuar me synimin për të promovuar të drejtat, barazinë dhe gjithëpërfshirjen sociale të personave LGBTQI+, ku të pranishëm ishin zëvendëskryeministrja Albana Koçiu, ambasadori i BE-së në Tiranë, Silvio Gonzato, i ngarkuari me punë i Ambasadës gjermane Thilo Schroeter e tjerë.
Në aktivitetin që nisi mesditën e sotme nga instalacioni “Reja” për të vazhduar përgjatë bulevardit “Dëshmorët e Kombit”, pjesëmarrës dhe përfaqësues organizatash marshuan në rrugët kryesore të kryeqytetit, duke përcjellë mesazhe kundër diskriminimit të këtij komuniteti dhe në mbështetje të respektimit të të drejtave të njeriut.
Gonzato theksoi se mbrojtja e të drejtave të komunitetit LGBTI pasqyron vlerat e një shoqërie gjithëpërfshirëse dhe mbështet çdo grup të cenueshëm.
Sipas tij, e vetmja gjë që edukimi mund të bëjë është t’i ndihmojë njerëzit të mos kenë frikë nga diversiteti.
Kjo paradë krenarie, siç e etiketojnë pjesëmarrësit e këtij komuniteti me sloganin “Vala kalon. Ne mbetemi. Bashkë”, ka në thelb të sajin rëndësinë e ndërgjegjësimit publik, mbrojtjes ligjore dhe krijimit të një mjedisi më të sigurt e gjithëpërfshirës për komunitetin LGBTI në Shqipëri.
“Sot, më shumë se kurrë, përgjigjja jonë është e njëjtë: Bashkë. Bashkë për t’i bërë ballë valës e për ta kthyer frikën në forcë.Bashkë për të kujtuar se ajo që kemi ndërtuar mes nesh është forca jonë më e madhe, që i bën ballë çdo vale urrejtjeje, një forcë e lindur nga kujdesi për njëri-tjetrin dhe që e kemi mbajtur gjallë gjithmonë, shpesh në heshtje, e padukshme për këdo tjetër”, shprehen përfaqësues të këtij komuniteti.
Gjatë aktivitetit, kishte performanca kërcimi, pankarta, flamuj shumëngjyrësh dhe thirrje për barazi, respekt dhe dinjitet.
Parada e krenarisë organizohet çdo vit në Tiranë si pjesë e aktiviteteve që synojnë promovimin e të drejtave dhe lirive themelore të njeriut.
/e.i/r.e/