Konfuzion në nominimet për US National Book Awards

Një shkrimtare e cila gabimisht është emëruar për çmimin National Book Awards në SHBA, por që ishte lejuar të qëndrojë në listën e ngushtë, tani është kërkuar nga ajo që të tërhiqet.

Libri ‘Shine’ i shkrimtares për fëmijë Lauren Myracle është paraqitur, javën e kaluar, në listën e ngushtë për letërsinë e të rinjve.

Por libri është tërhequr pasi National Book Foundation citoi një ‘keqkomunikim’ me anëtarët e jurisë.

Pak më pas, fondacioni e mirëpriti librin ‘Shine’ në kategori. Por të premten, nga Myracle u kërkua që të tërhiqej.

Në një deklaratë, Myracle tha se javën e kaluar ishte gëzuar shumë kur kishte pranuar një thirrje, duke i thënë se ‘Shine’ ishte finalist për çmimin.

“Më vonë më informuan se ‘Shine’ ishte përfshirë gabimisht por do të qëndronte në listë bazuar në vlerat e tij”, tha ajo.

“Megjithatë, të premten, më kërkuan nga Fondacioni Kombëtar i Librit të tërhiqem në mënyrë që të ruhet integriteti i shpërblimit dhe puna e jurisë, dhe unë u pajtova që të tërhiqem”.

Kur gabimi fillestar u bë, nga Fondacioni Kombëtar i Librit u tha se libri i Myracle është ngatërruar me librin që tingëllon ngjashëm të Franny Billingsley ‘Chime’, i cili është përfshirë në listë të ngushtë.

Janë katër kategori për këtë çmim – në fiksion, jofiksion, poezi dhe letërsi për të rinj – secili i përzgjedhur nga panele të veçantë të shkrimtarëve.

Të gjithë të nominuarit marrin nga një mijë dollarë dhe një medalje. Fituesit do të bëhen të ditur më 16 nëntor.