“Korpusi i Sigurisë”, qeveria transferon prona shtetërore tek Korporata e Investimeve Shqiptare (KISH), hap rrugën për partneritet publik-privat
Këshilli i Ministrave miratoi të mërkurën një vendim për të nisur projektin e investimit “Korpusi i Sigurisë”, duke transferuar pronat shtetërore të nevojshme në pronësi të Korporatës së Investimeve Shqiptare (KISH). Ky vendim e autorizon KISH-in të veprojë si zhvillues për realizimin e projektit, i cili ka si qëllim kryesor përmbushjen e interesit publik.
Projekti dhe roli i KISH
Vendimi i Këshillit të Ministrave, i marrë me propozim të Ministrit të Ekonomisë dhe Inovacionit, i jep dritën jeshile KISH-it të:
Të transferojë në pronësi pronat shtetërore për realizimin e “Korpusit të Sigurisë”.
Të veprojë si zhvillues i pronave, me qëllim realizimin e projektit.
Të hapë procedurën konkurruese për përzgjedhjen e partnerit privat për zhvillimin e pronave, nëpërmjet instrumentit të sipërmarrjes.
Kjo formë bashkëpunimi publik-privat synon të sigurojë ndërtime dhe zhvillime në standardet më të mira, të asistuar nga Agjencia Kombëtare e Planifikimit të Territorit (AKPT) për hartimin e projektideve arkitekturore.
Cilët institucione preken?
Projekti do të prekë disa institucione kyçe të sigurisë dhe zbatimit të ligjit, godinat e të cilave gjenden në pronat e transferuara. Institucionet e ngarkuara me zbatimin e këtij vendimi përfshijnë:
Drejtoria e Përgjithshme e Policisë së Shtetit
Garda e Republikës
Akademia e Sigurisë
Inspektoriati Kombëtar i Mbrojtjes së Territorit (IKMT)
Agjencia e Mbikëqyrjes Policore (AMP)
Instituti i Policisë Shkencore
Garancia për Institucionet Publike
Pavarësisht transferimit të pronave, VKM thekson se institucionet publike që zhvillojnë aktivitet në këto godina do të vazhdojnë punën derisa të marrin në dorëzim ambientet e reja.
Në rast se është e nevojshme që një institucion të largohet më herët për shkak të punimeve, KISH ka detyrimin t’i sigurojë ambientet e përkohshme për vazhdimin e aktivitetit, deri në marrjen në dorëzim të ndërtesave të reja.
Brenda 30 ditësh nga hyrja në fuqi e vendimit, KISH dhe institucionet publike përfituese do të lidhin marrëveshjet përkatëse të bashkëpunimit për të përcaktuar standardet dhe kushtet e projektit.
/rtsh.al/