Krime zgjedhore, GJKKO jep vendimin ndaj Dritan Stokës dhe Agim Osma, njëri në burg, tjetri në shërbim prove

Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka shpallur fajtorë dhe ka dënuar sot shtetasit Dritan Stoka dhe Agim Osma, të akuzuar për përfshirje në krime zgjedhore dhe ushtrim të ndikimit të paligjshëm ndaj zyrtarëve publikë.

Trupa gjykuese e përbërë nga gjyqtarët Erjon Çela, Flora Hajredinaj dhe Bib Ndreca, pas përfundimit të procesit me gjykim të shkurtuar, vendosi dënimin e të pandehurve, duke i shpallur fajtorë për veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsioni aktiv në zgjedhje”, të kryera në bashkëpunim.

Dënimet e dhëna

Sipas vendimit, i pandehuri Dritan Stoka është dënuar përfundimisht me 2 vite burgim. Gjykata fillimisht caktoi një dënim të bashkuar prej 3 vitesh burgim për dy veprat penale, por për shkak të aplikimit të gjykimit të shkurtuar, dënimi u ul me 1/3. Stoka do ta vuajë dënimin në një burg të sigurisë së zakonshme.

Për të pandehurin tjetër, Agim Osma, GJKKO vendosi gjithashtu një dënim përfundimtar prej 2 vitesh burgim (pas zbritjes së 1/3 nga gjykimi i shkurtuar). Megjithatë, ndryshe nga Stoka, për Osmën gjykata urdhëroi pezullimin e ekzekutimit të dënimit me burg.

Liria me kusht për Osmën

Bazuar në nenin 59 të Kodit Penal, Agim Osma është vënë në shërbim prove për një periudhë prej 24 muajsh. Gjatë kësaj kohe, ai nuk duhet të kryejë asnjë vepër tjetër penale, duhet të mbajë kontakte me Zyrën e Shërbimit të Provës dhe urdhërohet të mos shoqërohet me persona të dënuar.

Gjithashtu, Gjykata urdhëroi shuarjen e masës së sigurimit “Arrest në shtëpi” për Osmën, e cila ishte në fuqi që prej prillit të vitit 2024.

Akuzat

Dy të pandehurit u gjetën fajtorë për shkeljen e nenit 245/1 dhe nenit 328 të Kodit Penal. Prokuroria e Posaçme (SPAK) kishte ngritur ndaj tyre akuzën se në bashkëpunim kanë ndikuar në mënyrë të paligjshme tek zyrtarë publikë dhe kanë kryer veprime aktive korruptive në kuadër të proceseve zgjedhore.

/rtsh.al/