Kriminelët në mitingjet elektorale, vetëm në Tiranë 159 të arrestuar

Tiranë- Shpesh partitë kërkojnë të afrojnë persona që konsiderohen si të fortët rreth tyre, të cilët në shumë raste janë me precedentë penalë. Kjo kategopri përdoret si gardë për mbrojtjen e votave dhe qendrave të votimit, nga vetë partitë. Por ka edhe të fortë që ofrohen vetë në mitingjet e partive, për t’iu afruar pushtet dhe politikës e në këtë mënyrë shpresojnë të gjenë mbështetje për t’i shpëtuar ligjit.

Për këtë arsye mitingjet janë edhe vendet ku policia përqëndron punën më të madhe për kapjen e personave në kërkim. Një shembull domethenës për këtë e jep drejtori i policisë së Tiranës, Bernard Çaushaj, në një prononcim për Top Channel.

Ne e dimë që sa herë ka fushatë zgjedhore elementët me precedentë kriminalë u bashkangjiten fushatave, por një pjesë e subjekteve nuk i njohin këta persona sepse mendojnë që do përfitojnë një farë mbrojtjeje, por ata nuk i njohin, ka qenë detyra e jonë t’i evidentojmë. Për të demonstuar këtë që them, po ju tregoj një shifër, kemi kapur 159 persona në kërkim gjatë kësaj periudhe që është më shumë se dyfishi i kësaj shifre në periudha të tjera të vitit. Jo më larg se mbrëmë kapëm një person të shumë kërkuar për vrasje, nuk mund të them se i kemi arrestuar gjatë një tubimi apo një tubimi tjetër, janë masa permanente, jemi munduar të mos i godasim në tubime, i mbajmë nën vëzhgim dhe i godasim në rrugë, lokale apo pranë banesave,-tha ai.

Sipas drejtorit të Policisë së Tiranës kjo fushatë ka qenë më e qeta se çdo fushatë tjetër. “Sikurse edhe në vitet e mëparshme zgjedhore, kryeqyteti mban vendin e parë të tubimeve elektorale ku deri më tani janë organizuar 285 tubime të njoftuara në polici. Por, ndyshe nga fushatat e mëparshme, kjo fushatë konsiderohet për garantuesit e rendit si e qetë dhe pa zona të nxehta”,-tha Çaushaj.

Gjatë kësaj fushate, sipas drejtorit të policisë nuk ka patur denoncime për dhunë, grisje flamujsh apo banderolash ose incidente të tjera mes militantesh.