Kryeministri Berisha: Rritja e rrogave dhe pensioneve në muajin korrik, dëshmi e performancës së suksesshme të ekonomisë shqiptare

Nën drejtimin e kryeministrit Berisha u zhvillua sot mbledhja e radhës së Grupit Parlamentar të Partisë Demokratike. Në nisje të saj, Kryeministri bëri të ditur se qeveria do të miratojë së shpejti vendimin për rritjen e rrogave dhe pensioneve ne vend, duke e cilësuar këtë akt, dëshmi të performancës së suksesshme të ekonomisë shqiptare dhe të reformave të zbatuara prej saj.

Në fjalën e tij, kryeministri Berisha u shpreh:

“Sot kam kënaqësinë tu konfirmoj se janë bërë përllogaritjet e fundit dhe në mbledhjen pas kësaj të mërkure, qeveria vendos për rritjen e rrogave dhe pensioneve në vend. Nuk ka vendim më njerëzor se vendimi për të rritur në këtë periudhë, rrogat dhe pensionet për shqiptarët. Rritja e rrogave dhe pensioneve është një akt madhor, premtim madhor në politikën sociale të kësaj mazhorance dhe të kësaj partie. Por premtimet janë premtime, ato mbeten në letër në se nuk shoqërohen me realizimet. Rrogat nuk do të mund të rriteshin qoftë dhe një qindarke, madje në kushte të njëjta me vendet e tjetra të rajonit dhe të Evropës, ato do të duhej të uleshin në mënyrë të ndjeshme, pensionet nuk do të mund të rriteshin qoftë dhe një qindarkë, por do të duhej të praktikohej politika e ngrirjes së tyre, ose e uljes së tyre me 20 deri në 40% , ndihma ekonomike nuk do të ngrihej, por do të shkurtohej, në rast se ekonomia shqiptare, në rast se qeverisja, në rast se reformat nuk do të ishin një histori e vërtetë suksesi.

I tërë qëllimi i një qeverisje, i një qeverie, i reformave që ajo ndërmerr, është para së gjithash një dhe vetëm një, mirëqenie në rritje për qytetarët, përmblidhet ne një frazë të vetme, mirëqenie ne rritje për qytetarët. Mirëqenia ka aspektet e veta, të ardhurat, shkollimin, shërbimin shëndetësor, transportin, infrastrukturën, pra është esenca bazë  e një tërësie faktorësh, të cilave ne po i përmbaheni dhe të cilat po bëhen përditë  e me te prekshëm për qytetarët shqiptare. Pra ne vijmë në këtë prag vere pasi përjetuam dimrin më të vështirë të 27 viteve të fundit. Përsëri me  mundësinë  e plotë për rritjen e rrogave dhe pensioneve, pa marrë qoftë dhe një qindarkë të vetme borxh për rritjen e tyre. Ne vimë në këtë prag vere pasi me qindra projekte në infrastrukturën publike rrugore, të ujit, të energjisë, infrastrukturës dixhitale kanë lëshuar dhe po lëshojnë shtat çdo ditë e më shumë. Ky është modeli të cilin vendosem ne, ky është modeli i cili i qëndroi vështirësive më të mëdha të një krize multidimensionale, të shumanshme që ka pllakosur Evropën dhe që do të vazhdojë me sa duket për jo pak vite. Ky është modeli që bazohet në ligjet dhe në praktikat më të mira, që bën të mundur rritjen e të ardhurave, që bën të mundur rritjen e investimeve, që bën të mundur rritjen e rrogave, që bën të mundur rritjen e pensioneve, që bën të mundur ndryshime kolosale të infrastrukturës, që bën të mundur një besim gjithnjë  e më të madh tek Shqipëria dhe shqiptarët, jashtë çdo lloj dyshimi që vendi përballet me vështirësi të shumanshme të krijuara në tërësinë e tyre nga kriza evropiane, krizë kjo që dikton qëndrimin e sistemit bankar, krizë kjo që dikton luhatjet  e kursit të euros, krizë kjo që dikton për shkak të cënimit të fuqisë blerëse, prekjen e eksporteve, por që në tërësinë  e saj bën që ekonomia shqiptare të eci, të qëndrojë dhe të beje të mundur më të rëndësishmen rritjen e rrogave dhe pensioneve. Kjo rritje në vitin më të vështirë të krizës ekonomike për Evropën ka dhe një nëntekst që bëhet më reale se asnjëherë sepse e vërteta është që inflacioni po bie. Për shkak të krizës evropiane, rënia e çmimit të mallrave në Evropë, ka bërë që çmimet  këtu të ulen, më shumë se asnjëherë tjetër. Këtu natyrisht ndikon edhe prodhimi i rritur në vazhdimësi. Tani është periudha që ne po korrim, po vjelim rezultat e atyre politikave nxitëse që kemi ndërmarrë gjatë gjithë këtyre viteve të fundit për prodhimin bujqësor. Sot janë qarqe të tëra ku prodhimi bujqësor i artikujve të caktuar është rritur, jo një herë e pesë herë, por gjashtëmbëdhjetë herë, siç janë molla në qarkun e Korçës, apo zarzavatet në Berat,  Dumre  e kudo, është shumëfishuar sipërfaqja e serave diellore, ne paguajmë plastmasin, ne përpiqemi tu asistojmë fermerëve, është dy-trefishuar numri i rrënjëve të ullinjve që kanë hyrë në prodhim, janë shtuar në mënyrë të fuqishme kapacitet prodhuese për shkak të ndërtimit të infrastrukturës. Heroi i Edi Ramës, por njëkohësisht edhe miku im Dhimo Kote, më tha në takimin e fundit, se më parë eksportonte shalqi, ndërsa tani është shumëfishuar çdo gjë pasi është ndërtuar rruga dhe transporti, i cili më parë i merrte shumë kohë, tani realizohet në një kohë rekord. Për 8 vjet, atij (Dhimos) nuk ia ndërtuan rrugën. Se është kollaj ta bësh si të vetmin personazh pozitiv dhe në fakt ai e meriton,( unë habitem si e le Koçoja se ai nuk toleron njeri përvec vetes së tij. Ai është faktikisht Nënkryetari në hije i PS). Pra e gjitha kjo po jep rezultatet  e veta, po rritet prodhimi bujqësor dhe blegtoral në mënyrë të fuqishme çka bëri që çmimet të mos ecin me ato ritme që kanë ecur më parë. Rritja e rrogave dhe pensioneve, 5 % mesatare për rroga, rritja  e pensioneve të fshatit po kaq, rritja e pensioneve në qytet, që të gjitha dy ose tre herë më shumë se inflacioni, do të thotë një rritje  e fuqisë blerëse. Pseudoekonomistët e tyre thonë se rrogat shtohen dhe fuqia blerëse bie, por si ka mundësi kjo? 

Pra kjo përbën një rritje të ndjeshme të fuqisë blerëse shqiptare të 820 mijë familjeve shqiptare, të cilat nga data 15 korrik e në vazhdim do të marrin më shumë se para datës 15 korrik. Shqiptarët janë fatlum që këto vendime, këto akte madhore që prekin direkt jetën e tyre të përditshme, kursimet dhe mirëqenien e tyre, nuk mund të bllokohen për shkak se po të ishin dhe këto në ligjin e konsensusit,  jo që nuk do të rriteshin, por do të uleshin, jo që nuk do të miratoheshin, por do të bllokoheshin, sic u tentua të bllokohej tuneli i Kërrabës, sepse për zotin Rama, konsensus do të thotë bllokim. Ky është deshifrimi që i bën ai kërkesës civile të qytetëruar për konsensus.

*  * *

Duke e mbyllur, do të dëshiroja t’i bëj një thirrje zotit Edi Rama, të vendosim interesat evropiane të shqiptarëve si përparësi të çdo përparësie. Konsensusi nuk mund të përdoret për bllokim, konsensusi është proces në të cilin çdo palë duhet të bëjë lëshime. Kemi punuar muaj të tërë në reformën zgjedhore, e kemi sjellë atë pothuajse në përfundim të plotë. Është bërë një punë serioze. Nuk duhet që, në momentet e fundit, të përdoret fuqia politike e drejtuesit për ta bllokuar këtë proces. Përse ky proces nuk u bllokua 3, 2 apo 1 muaj më parë? Përse ekspertët dhe deputetët e të dy grupeve arritën dakordësinë në të gjitha çështjet? Sepse ne pranuam çdo propozim të tyre. Por, si e ka z. Rama konsensusin? 100 për qind për vete dhe asgjë kundërshtarit. Por ky nuk është konsensus. Nëse ti thua; “unë i dua të gjitha, ndërsa ti “bërrylin””, atëherë ti nuk je për konsensus, por deklaron që të fillim që je kundër konsensusit.

Ndaj dhe unë i bëj thirrje z. Rama të përparësojmë interesat evropiane të qytetarëve shqiptarë, të përfundojmë reformën zgjedhore, të lëmë mënjanë praktikat e “kokës së turkut”. “Koka e turkut” ne na u bë helmi në tepsi që servirte diktatura çdo gjashtë muaj, çdo vit, për të përzier shpirtrat e njerëzve. Nuk bëhet politika me “koka turku”, nuk bëhet konsensusi kështu. Nëse njëherë ti kërkon X-in e herë tjetër kërkon Y-in , atëherë duket sikur ne vendosim vetëm për të prerë koka. Nuk është demokracia prerje kokash. Ndaj e ftoj z. Rama, pa paragjykime, por duke vendosur interesat evropiane të qytetarëve shqiptarë si më të parat, e garantoj atë që, me angazhimin më të madh, do të mund t’i kompletojmë plotësisht reformat që presin shqiptarët. I bëj thirrje që ai të fillojë me cilën reformë të dojë, të fillojë me çështjen e imunitetit, që të mos pranojë më se është i vetmi opozitar në planet që e do qeverinë me imunitet, që do mazhorancën me imunitet. Le të ngrihet mbi “këshillin e miliarderëve”. Ata vërtetë janë 3 – 5 - 10 - 15, por janë qindra mijëra socialistët shqiptarë që nuk duan imunitet, as për qeveritarët demokratë, as për socialistët e as për askënd.  Është e qartë se muri i vërtetë për heqjen e imunitetit është “këshilli i miliarderëve”. Po mbahet peng procesi për pasuritë e Tomë Doshit, Sadri Abazit, Koço Kokëdhimës, Fidel Yllit, etj. Më mirë sill një ligj amnistie për këta, por mos mbaj peng proceset për ta. Ç’punë kanë qytetarët e thjeshtë me imunitetin, për çfarë u duhet atyre!. Përkundrazi, atyre u duhet që sa më shpejt qeveritarët e zyrtarët të jenë pa imunitet.

E ftoj edhe njëherë z. Rama që të angazhohemi në këtë proces, në interesin më të mirë të qytetarëve shqiptarë. Unë e kuptoj që ka njerëz të cilët nuk i duan, të cilët duan të bëjnë beteja politike për të maskuar bllokimin e imunitetit, për t’i përdorur si pretekst. Por koha është të kapërcejmë mbi to, koha është të votojmë ato reforma që i kemi pothuajse të finalizuara dhe në të cilat, ashtu siç është faktuar, PD-ja ka lëshuar në mënyrën më të vendosur dhe  të vazhdueshme.

18/06/2012