Kryeministri Berisha takon Drejtorin Ekzekutiv të Zyrës për Krimin dhe Drogat të OKB-së dhe njëkohësisht Drejtor i Përgjithshëm i Zyrës së OKB-së (UNODC) në Vienë, zotin Yury Fedotov

Kryeministri Berisha priti sot në një takim Drejtorin Ekzekutiv të Zyrës për Krimin dhe Drogat të OKB-së dhe njëkohësisht Drejtor i Përgjithshëm i Zyrës së OKB-së (UNODC) në Vienë, zotin Yury Fedotov.

Kryeministri Berisha i uroi mirëseardhjen zotit Fedotov dhe vlerësoi lart misionin e Zyrës së drejtuar prej tij, duke e siguruar zotin Fedotov për mbështetjen e plotë që Shqipëria i jep misionit dhe veprimtarisë së saj.

Kryeministri Berisha nënvizoi se lufta kundër trafiqeve, krimit të organizuar dhe korrupsionit, të cilat janë në qendër të mandatit të UNODC-së, përbejnë prioritetet absolute të qeverisë shqiptare. Në këtë kontekst, Kryeministri e njohu zotin Fedotov me reformat dhe arritjet e agjencive ligjzbatuese shqiptare në këto fusha.

Nga ana e tij, zoti Fedotov e cilësoi vizitën në Shqipëri si shumë të rëndësishme. Ai e konsideroi Shqipërinë dhe bashkëpunimin me agjencitë e saj ligjzbatuese shumë të rëndësishëm në kuadër të programit të ri rajonal për Evropën Juglindore “Lufta kundër trafiqeve ilegale dhe krimit të organizuar, duke përmirësuar qeverisjen, drejtësinë dhe sigurinë”.

Kryeministri e siguroi zotin Fedotov për mbështetjen e qeverisë shqiptare për këtë program dhe vlerësoi rolin e projekteve rajonale në këtë fushë. Kryeministri Berisha dhe zoti Fedotov ndanë të njëjtin qëndrim se qasja rajonale është kusht i rëndësishëm në luftën ndaj trafiqeve, krimit të organizuar dhe korrupsionit, si dhe nevojën për përfshirjen e Kosovës në këto programe rajonale.

Kryeministri shprehu interes që në bashkëpunim midis autoriteteve shqiptare, UNODC dhe Akademisë Ndërkombëtare Kundër Korrupsionit, të hapet një zyrë rajonale e Akademisë për kryerjen e trajnimeve antikorrupsion.