LONDËR – Sulm me thikë ndaj dy hebrenjve, arrestohet një 45-vjeçar

LONDËR, 29 prill /ATSH/- Dy burra hebrenj, një në të 70-at dhe një tjetër në të 30-at, u plagosën me thikë në zonën Golders Green në veri të Londrës, në një incident që autoritetet britanike e kanë shpallur si ngjarje terroriste, raportoi BBC.

Kronologjia e ngjarjes

Sipas policisë dhe dëshmitarëve lokalë, sulmi ndodhi në dy pika të ndryshme.

Një nga viktimat u godit me thikë pranë dyqaneve në rrugën Golders Green.

Viktima e dytë u sulmua në një rrugë pranë një sinagoge.

Të dy burrat u transportuan në spital dhe ndodhen në gjendje të qëndrueshme.

Arrestimi i autorit të dyshuar

Policia Metropolitane bëri të ditur se ka arrestuar një 45-vjeçar të dyshuar për tentativë vrasjeje. Sipas autoriteteve i dyshuari ka një histori dhune të rëndë dhe probleme të shëndetit mendor.

Ai u arrestua pasi një organizatë e sigurisë së komunitetit hebre e ndaloi përkohësisht gjatë përpjekjes për të sulmuar kalimtarë.

Policia përdori edhe pajisje elektrike neutralizuese gjatë arrestimit, pasi ai tentoi të sulmonte edhe efektivët.

Hetimi për terrorizëm

Hetimet janë marrë në dorë nga njësitë kundër terrorizmit, të cilat po shqyrtojnë motivet e sulmit, dhe nëse komuniteti hebre ishte shënjestruar qëllimisht.

Reagimi i Starmer

Kryeministri britanik, Keir Starmer deklaroi se qeveria do të rrisë financimin për sigurinë e komunitetit hebre, dhe do të trajtojë rrënjët e antisemitizmit dhe ekstremizmit.

Ai shtoi se ka zhvilluar një mbledhje emergjente dhe do të takohet me autoritetet e drejtësisë për të koordinuar përgjigjen shtetërore.

Ndërkohë, policia ka shtuar praninë e forcave në Londër pas sulmit dhe ka theksuar se hetimet janë në vijim për të zbardhur plotësisht rrethanat. //a.i/