LUKSEMBURG – BE-ja miraton misionin për trajnimin e forcave të sigurisë në Liban
LUKSEMBURG, 12 tetor /ATSH-DPA/- Ministrat e Jashtëm të vendeve anëtare të Bashkimit Evropian kanë rënë dakord të nisin një mision për të këshilluar dhe trajnuar forcat e sigurisë në Liban.
Misioni i ri synon të ndihmojë që forcat libaneze të sigurisë, të jenë në gjendje të ushtrojnë kontroll mbi të gjithë territorin e vendit, njoftoi sot shefja e diplomacisë së BE-së, Kaja Kallas.
Sipas diplomatëve evropianë, edhe Gjermania synon të marrë pjesë në këtë mision, por ende nuk është përcaktuar se çfarë kontributi do të japë.
Hezbollahu, një lëvizje e mbështetur nga Irani, vazhdon të ketë ndikim të konsiderueshëm në Liban.
Ndër vite, ai ka sulmuar vazhdimisht Izraelin, së fundmi që nga muaji mars, pas sulmeve izraelito-amerikane ndaj Iranit.
Izraeli është kundërpërgjigjur me sulme ajrore dhe me zgjerimin e operacioneve ushtarake tokësore në territorin libanez.
Qeveria e Libanit ka premtuar disa herë që të gjitha armët në vend, do të vendosen nën kontrollin e shtetit.
Megjithatë, deri tani është bërë pak përparim, pasi Hezbollahu vazhdon të kundërshtojë çarmatimin.
Izraeli deklaron se do t’i tërheqë trupat e tij nga jugu i Libanit, vetëm pasi të zbatohet procesi i çarmatimit.
Si do të funksionojë misioni i BE-së?
Misioni i ri pritet të nisë vitin e ardhshëm dhe do të ketë dy njësi: një ushtarake dhe një civile.
Njësia ushtarake do të këshillojë dhe trajnojë Forcat e Armatosura të Libanit.
Ndërsa njësia civile do të ndihmojë strukturat e tjera të sigurisë përmes këshilltarëve dhe trajnimeve të specializuara, për shembull për luftën kundër krimit kibernetik dhe kontrabandës.
Misioni synon gjithashtu të ndihmojë në krijimin e strukturave të përhershme të trajnimit dhe në përmirësimin e mënyrës se si menaxhohet siguria, përfshirë edhe në portin e Bejrutit.
Çfarë do të ndodhë me misionin e OKB-së?
Misioni aktual paqeruajtës i Kombeve të Bashkuara në Liban, i njohur si UNIFIL, pritet të përfundojë në fund të këtij viti.
Ai u krijua në vitin 1978 për të mbikëqyrur zonën kufitare mes Izraelit dhe Libanit.
Pas largimit të paqeruajtësve të OKB-së, ushtria libaneze pritet të marrë kontrollin e kësaj zone. //a.i/