Lamtumirë mbretit të televizionit, Pippo Baudo prehet në qytetin e tij të lindjes, Militello

Italia i dha lamtumirën e fundit një prej figurave më të dashura të saj, Pippo Baudo, në një ceremoni të prekëse dhe plot emocione në qytetin e tij të lindjes, Militello në Val di Catania. I njohur si “Mbreti i Prezantuesve”, Baudo ndërroi jetë në moshën 88-vjeçare, duke lënë pas një trashëgimi të pasur kulturore që përfaqëson një epokë të tërë të televizionit italian.

Funerali, i cili u transmetua drejtpërdrejt në televizion, mblodhi qindra qytetarë, miq të vjetër dhe figura të rëndësishme politike dhe publike për t’i bërë homazhe njeriut që i kushtoi jetën artit të argëtimit.

Trupi i tij, i shoqëruar nga vajza e tij Tiziana dhe nipërit, mbërriti nga Roma për të përmbushur dëshirën e tij të fundit: të varrosej në kapelën familjare në Militello, pranë prindërve të tij.

Një kthim në rrënjë

Për Militello-n, Pippo Baudo ishte më shumë se një figurë publike — ai ishte një anëtar i familjes. Kryetari i bashkisë, Giovanni Burtone, konfirmoi se dëshira e fundit e Baudos ishte pikërisht kthimi në qytetin e tij.

“Pippo donte të varrosej këtu. Ai ishte thellësisht i lidhur me komunitetin tonë,” tha Burtone. Ai shtoi se Baudo i kishte lënë një “trashëgimi politike”, duke e këshilluar të punonte jo vetëm për mirëqenien lokale, por me një “horizont më të gjerë”.

Miqtë e tij të fëmijërisë ndanë kujtime të ngrohta dhe prekëse. Francesco Coniglione, shok shkolle i Baudos, kujtoi me lot në sy shëtitjet e tyre të gjata nëpër qytet, ku ata “vizitonin përsëri vendet” dhe ndanin histori.

Salvatore Portuso, një tjetër mik i vjetër, theksoi se Baudo kishte një prirje artistike që në fëmijëri, por kurrë nuk tregoi arrogancë.

“Ai ishte një njeri me elegancë të jashtëzakonshme, i dashur me të gjithë dhe i hapur,” tha Portuso.

Edhe babai i tij shpirtëror, Don Giulio Albanese, e përshkroi Baudon si një njeri të përkushtuar. “Këto ishin javë me vuajtje të mëdha,” tha Don Giulio, duke zbuluar se Baudo kishte qenë nën ndikimin e morfinës, por “i kthjellët” deri në fund. Ai e përshkroi vdekjen e tij si mbylljen e një “libri… gati një shekull historie, por jo vetëm e RAI-t, është historia e Italisë.”

Trashëgimia e një ikone

Përtej lidhjeve të tij personale, trashëgimia e Baudos u theksua edhe në fushën profesionale. Angelo Bonelli, deputet i partisë Alleanza Verdi e Sinistra, ripropozoi propozimin e mbështetur nga figura si Lino Banfi, Amadeus dhe Fiorello, që Teatro delle Vittorie në Romë, vendi i disa prej shfaqjeve më të famshme të Baudos si Canzonissima dhe Fantastico, të emërtohet sipas tij.

Një peticion në Change.org gjithashtu kërkon këtë nder, duke theksuar se kjo do të ishte “njohja më e përshtatshme e asaj që ai përfaqësonte për RAI-n dhe për historinë e vendit tonë.”

Gjatë funeralit, Alessandro Baudo, djali i tij që jeton në Australi, ndau fjalë prekëse.

“Kam kujtime të mrekullueshme për të, të cilat do t’i mbaj gjithmonë me vete,” tha ai, ndërsa kujtoi vizitën e tij në Militello me djalin e tij, Sean. Ai shprehu keqardhje që babai i tij nuk mundi të takonte dy nipërit e mbesat e tij më të vogla.

Siç tha Don Giuseppe Luparello, famullitari i kishës, Pippo Baudo e filloi rrugëtimin e tij si djalë altari dhe argëtues në teatrin e famullisë. Sot, ai u kthye në shtëpi për të pushuar përgjithmonë. Dhe Militello, qyteti i tij i dashur, e mirëpriti me gjithë dashurinë dhe respektin që i përket një mbreti. ANSA

/rtsh.al/