Ligje për mbrojtjen e mjedisit/ Australia Jugore bëhet vendi i parë që ndalon shishet e vogla të salcës së sojës
Nga data 1 shtator, Australia e Jugut do të ndalojë përdorimin e shisheve të vogla të salcës së sojës në formë peshku, që shpesh shoqërojnë ushqimet me sushi të paketuara.
Enët ikonike janë bërë një element kryesor në shumë restorante aziatike dhe restorante me porosi në të gjithë botën, ndërsa dyqanet dhe bizneset në Australinë Jugore do të ndalohen t’i shesin ose shpërndajnë ato nga e hëna.
“Çdo enë në formë peshku përdoret vetëm për sekonda, por mbetet në mjedis për dekada ose shekuj nëse hidhet në plehra”, tha Ministrja e Mjedisit dhe Zëvendëskryeministrja për Australinë Jugore, Susan Close.
Ky veprim bazohet në legjislacionin e miratuar në vitin 2023 që ndaloi qeset e supermarketeve, pipat plastike, përzierëset e pijeve, shkopinjtë e pambukut dhe konfeti, ndër të tjera.
Sipas autoriteteve vendase ky është një hap i ri në kuadër të një plani më të gjerë për të reduktuar përdorimin e plastikës njëpërdorimshe.
Shishet e njohura si shoyu-tai, të shpikura në Japoni në vitet 1950, fillimisht ishin prej qelqi apo qeramike, por më vonë filluan të prodhohen nga plastika. Ekspertët thonë se përmasat e tyre të vogla i bëjnë të papërshtatshme për përpunim në makineritë e riciklimit, dhe për këtë arsye përfundojnë zakonisht në landfille.
Ndalimet e reja përfshijnë gjithashtu etiketa të padekompozueshme për frutat dhe perimet si dhe tasat e gotat plastike për ushqimet e gatshme.
Nisma të ngjashme janë ndërmarrë edhe në Angli, Skoci dhe Uells. Në Angli, që nga tetori i vitit 2023, ndalimi i enëve plastike njëpërdorimshe dhe tarifimi i qeseve ka çuar në një rënie prej 97% në përdorimin e tyre, sipas qeverisë.
/rtsh.al/