Lufta, Biden: Vdekjet në zonat humanitare në Gaza po komplikojnë negociatat
Presidenti i SHBA Joe Biden ka deklaruar se administrata e tij po shqyrton atë që ka ndodhur në zonën e shpërndarjes së ushqimit në Gaza – ku zyrtarët lokalë e shëndetësisë thonë se më shumë se 100 njerëz u vranë dhe qindra të tjerë u plagosën ndërsa ai pranoi se incidenti do të ndërlikojë negociatat në rajon.
“Jemi duke e shqyrtuar incidentin, por ka dy versione të asaj që ka ndodhur. Nuk kam ende një përgjigje,” tha presidenti Biden.
Biden ka thënë se përshkallëzimi i konfliktit do të ndërlikonin negociatat.
Por Biden ende shprehu optimizëm se një marrëveshje për pengjet dhe një armëpushim i mundshëm mund të arrihet së shpejti.
Një zyrtar i lartë i administratës Biden tha se incidenti i ka bërë zyrtarët amerikanë të ndjejnë edhe më shumë presion për të arritur një marrëveshje armëpushimi për lirimin e pengjeve.
Biden komentoi se një marrëveshje mund të arrihet deri në fund të fundjavës.
Zyrtarët izraelitë, Hamasi dhe Katari të gjithë u distancuan nga optimizmi se mund të arrihet deri në fund të kësaj jave një marrëveshje për armëpushimin në Gaza.
Ndërkaq, shefi i ndihmave të Kombeve të Bashkuara paralajmëroi në Gaza po shuhet jeta “me shpejtësi të tmerrshme”, mes raporteve më shumë se 100 njerëz u vranë dhe qindra u plagosën në brez ndërsa prisnin ndihmë.
“Edhe pas gati pesë muajsh armiqësi brutale, Gaza po vijon të na tronditë ”, shkroi Martin Griffiths, nënsekretari i përgjithshëm i OKB-së për Çështjet Humanitare dhe Koordinatori i Ndihmës Emergjente në X.
Shefi i ndihmës i OKB-së shtoi se ai ishte “i tmerruar nga vrasja dhe plagosja e qindrave njerëzve gjatë transferimit të furnizimeve me ndihma në perëndim të qytetit të Gazës”.
/rtsh.al/