Lufta me Rusinë-Die Welt: 2 mijë kolumbianë luftojnë krah forcave ukrainase

Rreth 2 mijë kolumbianë po luftojnë me forcat e Mbrojtjes së Ukrainës kundër forcave ruse.

Ashtu siç raporton gazeta gjermane Die Welt, e cila citon informacione nga burime të brendshme, shkruan se fluksi i vullnetarëve nga Amerika e Jugut është aq i madh sa disa brigada kanë formuar kompani të dedikuara.

Ndërsa Ukraina më parë pranonte kryesisht kandidatë me përvojë ushtarake, tani po pranon edhe rekrutë pa shërbim të mëparshëm, të cilët i nënshtrohen trajnimit para se të dërgohen në front.

Brigada e 47-të përfshin një njësi të përbërë pothuajse tërësisht nga kolumbianë, krahas vullnetarëve nga vende të tjera të Amerikës së Jugut.

Në gusht, Hromadske raportoi se rreth 8 mijë vullnetarë të huaj shërbejnë në Forcat Tokësore të Ukrainës, nga vende të ndryshme. Rreth 40% janë nga Amerika e Jugut.

Sipas Konstiantyn Milevskyi, ushtrues detyre i kreut të zyrës që koordinon shërbimin ushtarak të huaj në Forcat e Armatosura të Ukrainës, regjistrimet mujore të të huajve u rritën nga 100–150 në fillim të pushtimit në shkallë të plotë në rreth 600 deri në verën e 2025-s. Vullnetarët e huaj marrin të njëjtat furnizime dhe garanci sociale si qytetarët ukrainas.

Shumë regjistrohen për pagën (rreth 3,000 € në muaj), ndërsa të tjerë thonë se duan të ndalojnë ushtrinë ruse, duke argumentuar se presidenti Vladimir Putin nuk do të ndalej te Ukraina.

Ekonomisti ukrainas Roman Sheremeta shkroi në rrjetin social ‘X’ se deri më 27 tetor 2025, 348 kolumbianë ishin vrarë duke luftuar me Forcat e Mbrojtjes së Ukrainës kundër forcave ruse.

Ai shtoi se të vdekurit përfshijnë edhe 100 qytetarë amerikanë, 91 gjeorgjianë, më shumë se 50 bjellorusë, 49 rusë, më shumë se 40 britanikë, 37 azerbajxhanas, më shumë se 30 brazilianë, 20 qytetarë francezë dhe të tjerë. Në total, vullnetarë nga 65 vende janë vrarë duke mbrojtur Ukrainën nga pushtimi rus.

/rtsh.al/