Lufta në Ukrainë, forcat e Kievit kundërsulm drejt Khersonit të pushtuar nga rusët

Presidenti i Ukrainës Volodymyr Zelensky thotë se forcat e tij po përparojnë “hap pas hapi” në rajonin jugor të pushtuar të Khersonit. Qyteti Kherson ra në duart e Rusisë në fillim të luftës dhe ndodhet në një vend strategjik në perëndim të lumit Dnipro.

Të shtunën, zyrtarët e mbrojtjes në Mbretërinë e Bashkuar raportuan për luftime të ashpra pranë Khersonit. Përparimi ukrainas nënkuptonte se linjat ruse të furnizimit në perëndim të lumit ishin “gjithnjë e më shumë në rrezik”, sipas vlerësimit të tyre.

Në fillim të këtij muaji, zëvendëskryeministrja e Ukrainës Iryna Vereshchuk u kërkoi banorëve të Khersonit të evakuonin qytetin sa më shpejt të jetë e mundur për të shmangur bllokimin në qytet gjatë një kundërofensivë në Ukrainën jugore.

“Është e nevojshme të bëhet kjo që Forcat e Armatosura të Ukrainës të mos rrezikojnë popullsinë civile gjatë operacioneve sulmuese”, tha ajo për televizionin shtetëror.

Serhiy Khlan, një këshilltar i qeverisë së Khersonit, i tha televizionit ukrainas se rajoni do të “çlirohet përfundimisht deri në shtator”, raporton AFP. Forcat e Kievit kanë synuar kalimet e lumenjve në rajon në një përpjekje për të shtrirë linjat e furnizimit të Rusisë. Të shtunën, një sulm artilerie goditi urën Daryivskyi mbi lumin Inhulets, një degë e Dnipro. 

Dhe të martën, ata shënjestruan Urën Antonivskyi mbi vetë Dnipro me artileri të furnizuar nga SHBA. Duke folur për agjencinë e lajmeve Tass të mbështetur nga shteti, nënkryetari i administratës së mbështetur nga Rusia në Kherson pranoi se nëse sulmet vazhdojnë, ura mund të shembet. 

Zyrtarët e Mbretërisë së Bashkuar e kanë përshkruar Urën Antonivskyi si një “vulnerabilitet kyç” për forcat ruse dhe të shtunën thanë se nëse “mohoheshin kalimet dhe forcat ruse në Kherson të pushtuar ndërpriteshin, do të ishte një pengesë e rëndësishme ushtarake dhe politike për Rusinë”. 

Z. Khlan tha se “çdo urë është një pikë e dobët për logjistikën dhe forcat tona të armatosura po shkatërrojnë me mjeshtëri sistemin e armikut”. Ndërkohë, një këshilltar i lartë i mbrojtjes i Zelensky pretendoi se rreth 1000 trupa ruse në rajon janë rrethuar nga forcat ukrainase. Oleksiy Arestovych tha se rusët ishin kapur në një “rrethim taktik” pranë fshatit Vysokopillya në rajonin Kherson. BBC nuk e ka verifikuar në mënyrë të pavarur këtë pretendim. BBC

/rtsh.al/