Lufta perfekte e Elvira Dones prezantohet në Torino dhe Milano

Shkrimtarja Elvira Dones do të prezantojë romanin e saj të fundit “Piçola guerra perfetta”, më 23 shtator në Milano dhe më 24 e 25 shtator në Torino. Shumë shpejt shqiptarët, por edhe lexuesit italianë të dashuruar pas letërsisë së Elvira Donesit në Lombardi dhe Piemonte, kanë rastin të takojnë shkrimtaren që prezanton romanin e saj të fundit "Piçola guerra perfetta", me parathënie të Roberto Savianos. Në Milano takimi me shkrimtaren do të mbahet në Sallën Grechetto të Pallatit Sormani (via Francesco Sforza, 7), të premten më 23 shtator në orën 19:00. Takimi organizohet nga Qendra e Kulturës shqiptare në bashkëpunim me shoqatat "Illyricum", "New Age", "Dora e Pajtimit" & "Biblioteka Sormani", IPSIA, Acli Lombardia & Shtëpia botuese "Einaudi" dhe me përkrahjen e Konsullatës së Përgjithshme të Shqipërisë në Milano. Elvira Dones është një nga penat shqiptare që ka ditur të rrëfejë e të perceptojë me nuhatje të hollë temat shqiptare. Por në krijimtarinë e saj nuk ka vetëm Shqipëri. Duke filluar që nga autobiografiku "Dashuri e huaj" e deri tek i fundit "Lufta e vogël e përkryer" lexuesit i ofrohet një mozaik copëzash Shqipërie, por edhe Ballkani, copëzash historie të dokumentuara nga afër në mënyrë të gjallë me jetët e personazheve të saj. Romani "Piçola guerra perfetta" nuk është një roman mbi luftën. Është lufta. E parë përmes brishtësisë së viktimave, gra shumë të ngjashme me ne, pjesë e botës sonë. Është lufta, për herë të parë kaq pranë nesh sa çdo tmerr, edhe më sfilitësi, do të na duket i mundshëm. "Piçola guerra perfetta" është ajo e ndezur nga NATO në qiejt mbi Kosovë më 24 mars 1999, që do të përfundojë më 12 qershor. Duhej të ishte e vogël dhe e përkorë, sepse asnjë ushtar amerikan nuk do të kthehej në shtëpi në arkivol, kështu u premtua. Por e parë nga terreni, qe krejt tjetër gjë.